NUPELA haiskul bilong Gumine Distrik long Simbu bai i op neks yia.

Dispela skul, Digine Haiskul bai kisim klostu long 300 sumatin.

Ol wok bilong bildim klasrum i pinis, na wanpela las klasrum bai i pinis long dispela mun. Kontrakta husat i go pas long bildim dispela las klasrum,  Medina Bilding na Konstraksen i tok wok i bin stat kamap long las mun bai i pinis long dispela mun.

Digine Haiskul i stap long Karamaril sab-distrik long Digine Lokal Level Gavman (DLLG) na i bringim namba bilong haiskul long Gumine distrik i go antap long tripela olgeta.  Ol haiskul ya i stap wan wan long ol tripela LLG, em Digine, Kumai-Bomai na Gumine.

Digine Haiskul i gat pinis tupela nupela klasrum na wanpela opis bilong ol tisa.

Lida bilong Karamaril, Pita Gonare i tok skul ya i bin i gat pinis 8-pela klasrum, 15 haus slip bilong ol tisa em ol makim pinis long ol haus bilong gavman opisa i stap long Karamaril sab-distrik.

Mistar Gonare i tok bihain skul bai bildim ol haus bilong ol tisa long yia bihain.

Mista Gonare i tok long yia 2022 skul bai i kisim 300 sumatin long ol fida skul bilong ol long 9-pela skul;  Kel-Biri, Aun, Gaima, Aihalunga,  Spakul, Genabona, Ningoruma wantaim Pildimna praimeri skul.

Digine Haiskul i rejista pinis wantim Edukesen Dipatmen, olsem tasol Mista Gonare i tok tenkyu i go lo Memba bilong Gumine long mekim dispela i kamap taim Nick Kuman i bin stap Minista bilong Edukesen long yia 2016.

Gonare tu i tok amamas i go long Gumine Distrik Divelopmen Atoriti long katim mani long Distrik Sevis Impruvmen Program long kamapim Digine Haiskul.

Mista Nick Kuman tu i tok olsem Gumine i mas i gat inap skul bilong ol pikinini i ken i kisim gut long skul.

Mista Kuman i laik bai ol papamama, tisa, na ol bod bilong skul i mas wokbung wantaim long wanem skul bilong ol pikinini i mas kamap nambawan samting long laip bilong ol.

Gumine now i gat tripela sekenderi skul i stap pinis wantaim tupela TVET skul na moa long 30 praimeri skul.

Ennio Kuble i raitim