KONGAMIL Intergrated English Phonics Skul long Jiwaka i gat bikpela tingting long kamapim planti kwaliti student husat bai i go stret long ol yunvesiti na koles.

Dairekta bilong dispela skul, Peter Mamsu Kumiye, i tok ol bai strongim kwaliti faundesen edukesen long taim ol pikinini i liklik yet.

“Mipela i skulim ol pikinini kam long kindagaten i go inap long Gret 6 em krismas bilong ol i stap namel long 3 na 12 yia.

“Inglis em ki bilong stadi long olgeta sabjek. Olsem na mipela i traim long skulim olgeta yangpela pikinini long strongim Inglis bilong ol na gro wantaim long sistem,” Mista Kumiye i tok.

Em i tok moa olsem ol sumatin husat i bin pas aut long skul bilong ol na bin go long meinstrim skul em ol top sumatin long klas bilong ol.

“Mi bin statim dispela institusen long 2011. Dispela em namba 11 yia bilong skul na mipela i save sasim skul fi long klas em K1,200 na ol sumatin long kindagaten go antap long Gret 6 i save baim K1,700.

“Dispela i no bilong mani tasol. Mipela i laikim kamapim kwaliti faundesen long ol sumatin bilong mipela.

“Mipela i yusim ol skul fi long bildim nupela klasrum, baim ol yunifom na givim lans long ol sumatin.

“Mipela i bin statim skul long ples Kongambil na nau mipela i bildim sampela infrastraksa long Banz taun bilong ol kindagaten klas.

“Dispela ol liklik pikinini i ken toktok gut tru long Inglis na i winim ol haiskul sumatin bikos mipela skulim ol foniks, speling na pronaunsiesen teknik.

“Ol i ken tok Inglis olsem nomol konvesesen na pronaunsim gut wan wan leta,” Kumiye i tok.

Em i tok ol sumatin bilong nau i save ritim planti buk we em ki skil long save gut long Inglis. Em i tok student husat i pinisim Gret 12 i no save painim spes long ol yunivesiti o koles bikos no gat gutpela Inglis standet.

Em i tok Jiwaka em i nupela provins na i gat bikpela nid long human risos divelopmen na kain institusen em i bikpela samting long provins long kamapim gut standet bilong edukesen.

HOFFMAN GULGARYE i raitim