MOA long 236 skul long Madang i no kisim Tuisen fri fi bilong yia 2021. Wanpela bilong ol dispela skul em Aiome Anglican Haiskul long Middle Ramu Distrik.

Dispela skul i gat gret 9 na 10 tasol. Ol 500 sumatin i save skul long dispela haiskul. Gavaman i no givim mani bilong ranim dispela skul long tem 1 na 2. Prinsipel bilong Aioma Haiskul, Francis Kumo i tok em i wok long painim ol rot bilong ranim dispela skul.

Em i tok, “Long stat bilong skul yia, 230 gret 10 sumatin i kam insait na rejista long skul. Bihain long namel bilong tem wan na tu, planti bilong ol sumatin i lusim skul long wanem i no gat inap kaikai na no gat gutpela hap bilong ol long lainim samting. Ol 86 gret 10 sumatin tasol bai sindaun long eksam bilong ol long dispela yia, 2021.

Francis Kumo i tok Pastaim ol sumatin husat i save slip long skul i save kaikai tripela taim long wan de tasol nau ol i no gat inap kaikai na ol i save kaikai tupela taim tasol. Ol i no save kaikai planti kaikai.

Memba bilong Mddle Ramu i bin givim K20,000 taim Francis Kumo i askim long helpim. Em i spendim K14,000 long baim kaikai na K3000 i go long feul na K3000 i go long transpot. Dispela kaikai em i helpim ol sumatin long tem tu long stat na i go pinis.

Long taim skul yia i stat ol papa na mama bilong ol sumatin i bin baim sampela fi inap long K40,000. Dispela i helpim long stretim ol skul samting olsem klasrum we i bin bagarap.  

Francis Kumo i tok long taim em i go insait long dispela skul long namba wan taim, no gat wanpela rekot i stap long operesen bilong skul. Em i stretim na traim long fiksim ol samtintg i no wok gut. Em i rausim olgeta tisa pastaim ol i save stap long Aiome na putim ol nupela tisa.

Samantha Solomon i raitim