MEMBA bilong Wabag taun na Minista bilong Fiseris na Marin Risos, Dokta Lino Tom i bin tokim ol pipel bilong em long sapotim edukesen bilong ol pikinini.

Dr Lino i bin givim K300,000 long sapotim Wabag Kristen Akedemi las wik.

Em i tok dispela K300,000 em i bilong sapotim dispela praivet skul long apgretim na impruvim skul infrasksa na tu luksave long ol arapela edukesen nid na rikwaimen bikos dispela skul i save kamapim kwaliti edukesen sevis long ol pikinini long las 20 yia.

Dokta Lino i tokaut long brukim graun bilong sanapim K18 milien distrik edministresen 3 stori kompleks bilding bai kamap long taim Praim Minista James Marape i go long Nesenel Ekseketiv Kaunsil kibung long Wabag long namba 3 Joint Supervisory Bodi (JSB) Kibung long dispela wik.

Dokta Lino i tokaut tu olsem em i painim K2 milien pinis long statim konstraksen bilong Infomesen  Komyunikesen Teknoloji (ICT) koles bai ol i sanapim long Yamneges gavman stesin wantaim nupela distrik het kwata opis.

Em i tok distrik hetkwata bilding i stap long komesel graun na i no graun bilong gavman olsem na ol i laik muvim nupela distrik hetkwata i go long Yamneges gavman stesin .

Em i askim tupela wod kaunsila bilong Wabag taun wod 1, Lennie Maliso na WULLG wod 2, Silas Kamberan, long wokim infomol grup bai gavman i ken wokbung wantaim ol long divelopim wan wan kaunsil wod.

Wabag raun i redi long holim namba 3 AROB-PNG Gavman namba 3 Joint Supervisory Bodi Kibung. Dispela kibung bai stat long 23 Jun i go inap long 27. Praim Minista James Marape wantaim NEC bai bung wantaim Presiden Ismael Toroama na AROB gavman long dispela bikpela bung.