MEMBA bilong Usino-Bundi distrik, Jimmy Uguro, i kapsaitim moa gutpela sevis long distrik bilong em.

Long las wik Mista Uguro husat i Minista bilong Edukesen i bin givim sampela samting long helpim na promotim sevis deliveri plen bilong em long distrik.

Mista Uguro i givim ki bilong nupela skul trak bilong Usino teknikol haiskul long Prinsipel bilong skul, Misis Dorea long Walium gavman stesin.

Uguro yet em i bin plena na pastaim long em i kamap memba bilong palamen, em i bin redim ol plen long ol skul insait long Usino-Bundi distrik. Em i laik strongim human risos bilong distrik we ol pikinini na yangpela i mas kisim gutpela save na mekim gutpela disisen long laip na gutpela sindaun long helpim komyuniti long bihain taim.

Usino Teknikol Haiskul em namba wan kain skul olsem long Madang provins, na dispela i kamap bihainim gutpela tingting na plen bilong Uguro long ol yangpela pipel i lainim ol tred skil na save long mekim wok.

Uguro i luksave olsem Usino-Bundi distrik i gat ol mineral na arapela risos projek i stap long distrik olsem na MP bilong distrik em i laik ol pikinini bilong Usino-Bundi Gama i skul na lainim ol tred skil long wok long ol dispel bikpela risos projek.

Ol risos projek insait long Usino-Bundi distrik em long RamuNiCo Projek, Ramu Agri Indastris na Yandera gold projek we i no kirap yet.

Presiden bilong Usino lokal level gavman (LLG) Peiwa Aimai, i tok amamas long Mista Uguro long bikpela helpim em i givim long Usino Teknikol Haiskul.

Misis Dorea i tok tenkyu long Minista Uguro na i tok dispel helpim em i givim em bikpela tru. Dispela trak bai helpim long bringim skul saplai na tu helpim ol sumatin na tisa long transpot.

James G. Kila i raitim