IMEJENSI Dipatmen bilong Pot Mosbi Jeneral Haus sik i kisim 7-pela lain long Tunde moning, husat i kisim bagarap long bodi bilong ol bihain long bas ol i kalap long en i ron i go arere long rot na i bam.

Dispela bas i bin pulap wantaim ol skul pikinini i stap namel long krismas bilong 7 na 15. Nogat wanpela i dai tasol ol famili bilong ol i wok long tingting planti long bagarap i kamap long bodi bilong ol.

Wanpela mama bilong wanpela pikinini meri krismas bilong en i seven i wari na tingting planti long pikinini bilong en husat i kisim bagarap long lek.

“Mi wari na tingting planti sapos em bai wokabaut o nogat. Tasol ol dokta tok ol bagarap em i kisim i no bikpela tumas na em bai pilim orait na wokabaut ken. Wari bilong mi em olsem sapos em i no wokabaut bai mi pilim pen stret tasol ol dokta tok em bai wokabaut olsem na mi bai wetim em long haus sik i stap,” Norma Dalu Heritrenggi  i tok.

Wanpela kar tu i  bin bungim hevi long wankain taim long 5 mail tasol wanpela man tasol i kisim bagarap na nogat wanpela i dai.