PLANTI manmeri long Isten Hailans bai i ken kisim sik coronavirus (COVID-19) na givim long ol arapela manmeri, sapos ol i no kisim COVID-19 banis sut.

Senta bilong kisim COVID-19 banis sut em i stap pinis insait long Goroka Provinsal Beis haus sik, na em i stap sori, long wanem no gat manmeri i go long kisim COVID-19 veksinesen.

Dispela em i strongpela toktok Isten Hailans Provinsal Helt Atoriti (EHPHA) Dairekta bilong Pablik Helt Sevis, Dokta Max Manape, i bin mekim long taim em i bin lukluk raun long COVID-19 senta long Goroka.

“Isten Hailans i gat sampela keis bilong COVID-19 olsem na mipela i mas lukluk, tingim dispela, kamap na kisim marasin bilong banisim mipela yet na stap tasol long provins,” Dokta Manape i tok.

Em i tok long nau yet planti manmeri na pikinini tu i no moa tingim sefti na helt, laip na gutpela sindaun bilong ol.  Na ol i no save wasim han, pasim pes mask na stap longwe long ol arapela manmeri.

“Mipela i traim long bringim toksave i go daun long helpim ol long banisim na abrusim sik COVID-19.

Tasol dispela ol toksave i pundaun long ol yaupas. Pasin bilong sakim tok na bikhet em i kamap bikpela tru namel long ol na dispela bai i mekim sik COVID-19 i kamap bikpela,” Dokta Manape i tok.

Em i tok planti ol arapela toktok tu i wok long kamap long ol sios na ol lain husat i autim tok bilong Bikpela long strit (street preacher) we i stopim planti ol bilip manmeri long kisim banis sut bilong COVID-19. 

“Lo bilong COVID-19 em i kamap na i stap pinis.

Olsem na husat man o meri i laik sakim dispela lo, ol bai kisim bikpela mekimsave long ol,” Dokta Manape i tok.

Sape Metta i raitim