GAVMAN bilong Saina i givim ol medikol saplai long Papua Niugini long mak bilong K300,000.

“Gavman bilong Saina i givim ol dispela medikol ikwipmen, ol marasin, na ol samting bilong haus sik i go long gavman bilong PNG long sapotim pait egensim COVID-19 na long givim gutpela medikol sevis long ol pipel bilong PNG,” Embeseda bilong Saina long PNG, Zeng Fanhua i tok.

Zeng Fanhui em i nupela embeseda bilong Saina long PNG. Faivpela wik i go pinis em i kam long PNG na stat wok.

“Taim mi kam stat wok long PNG mi amamas tru long gutpela pasin bilong pren we Saina na PNG i save soim long wanpela na narapela. Fotifaiv krismas i go pinis, Saina na PNG i kamap pren. Tupela kantri i gat rispek na bilip long wanpela na narapela na i save givim sapot long wanpela na narapela tu.”

Helt Minista, Jelta Wong i makim maus bilong nesenel gavman na i tok tenk yu long ol donesen na  em i tok welkam gen long ol medikol tim bilong Saina husat i stap long dispela taim long lukim dispela seremoni.

Long dispela taim tu, Embeseda Fanhui i tok, gavman bilong Saina bai givim ol COVID-19 veksin bilong Saina we i strong na seif long PNG long dispela wik.

Rebecca Negere i raitim