LEMAKOT  Skul ov Nesing long Nu Ailan Provins gat wanpela nupela mes o ples bilong kaikai.

Asbisop Rochus Tatamai i blesim dispela nupela mes na Deputi Gavana bilong Nu Ailan Provins, Sammy Misen i bung wantaim em na i opim dispela mes.

Prinsipal bilong dispela skul, Cathreen Songonai i tok i no bin isi long wokim dispela mes bilong ol studen. Em i tok ol wok i bin kamap inap 5-pela yia  long sanapim dispela mes.

 Ol i bin yusim sampela skul fi mani long statim wok na bihain Gavana bilong Nu Ailan, Sir Julius Chan i bin helpim ol wantaim K150, 000 aninit long polisi bilong helpim sios na ol i pinisin dispela mes.

“Mipela tok tenk yu long Nu Ailan Gavman na Katolik Sios long salim mani i kam long dispela bikpela institusen. Dispela skul i save givim sevis long ol pipel bilong Nu Ailan na ol arapela pipel bilong Papua Niugini tu. Ol dispela sumatin bai go long ol rurel komyuniti insait long kantri na helpim ol pipel wantaim helt sevis,” Songonai i tok.

 Songonai i tok moa olsem, i gat planti moa impruvmen i mas kamap long dispela institusen long inapim tingting bilong e mi kamap hap bilong Nu Ailan Yunivesiti.

“Mipela i gat hevi long spes. Ol fesiliti bilong mipela nau yet i ken lukautim 88 sumatin tasol mipela i enrolim 120 sumatin. I gat nid long wokim ol domitori i go bikpela na wokim sampela moa rum bilong leksa. Mipela i sori tru long rausim ol sumatin i go bek taim ol i laik skul olsem na mipela i kisim moa long mak mipela inap long kisim long en,” Prinsipal Songonai i tok.