OL sumatin meri long Yunivesiti bilong Papua Niugini (UPNG) i bin bung na mekim liklik bel isi wokabut long soim UPNG Edministresen olsem ol i wari long sefti bilong ol meri insait long skul kempus.

SRC Presiden bilong UPNG Meri, Nancy Paglau i tok pasin bilong ol man long paitim na holim ol meri student insait long Yunivesiti i mas stop.

Mis Paglau i tok dispela hevi i save kamap olgeta taim insait long skul tasol no gat wanpela senis i bin kamap olsem na ol UPNG meri sumatin i bin soim skul Edmin long luksave na stopim dispela hevi long kempus.

“Mipela i save toktok strong long dispela hevi na raitim planti ripot i go long ol namba wan poin lain em sekyuriti bilong skul, tasol ol dispela ripot i no save go long ol rait lain,” Paglau i tok.

“Mipela i laikim gutpela sapot bilong skul edministresen na tu bilong ol man sumatin long helpim mipela ol meri long dispela,” em i tok.

“Nau em taim bilong senisim dispela ol hevi na kamap olsem man na rausim tingting bilong ples go bikos dispela tingting i ken bagarapim nem bilong yunivesiti na bilong mipela olgeta yunivesiti sumatin,” em i tok.

“Nau mipela i gat sans long askim ol edmin i mas harim maus bilong mipela ol meri na helpim mipela,” em i tok.

Em i tok ol UPNG kaunsil i wanbel na kisim dispela komplen bilong ol meri sumatin na nau ol bai mekim disisen bihain long tupela wik.

Jacklyn Kimala i raitim