Ol pipel long Pari komyuniti long ol Motu Koita viles long Nesenel Kepital Distrik (NCD) i stat long kisim ol banis sut o veksin bilong COVID-19 long las wik Fraide.

Sikispela wik i go pinis Siaman bilong Motu Koita Asembli na Deputi Gavana bilong Nesenel Kepital Distrik, Dadi Toka Jr na tim bilong en i bin kamapim dispela tingting long mekim COVID-19 Mobail Veksinesen program long komyuniti. Dispela i ken helpim ol long karim veksin bilong COVID-19 i go long ol komyuniti long ol Motu Koita Viles.

Bihain long dispela sikispela wik ol i senisim insait bilong wanpela bikpela bas na mekim em i kamap liklik haus sik. I gat ol bet na ol marasin na ikwipmen bilong helpim ol sikmanmeri na pikinini insait long bas.

Siaman Dadi Toka i tok kost bilong dispela olgeta samting i olsem K100,000.

“Mipela i mekim dispela bikos mipela i ken ran long dispela bas i go long wan wan haus lain long Motu Koita na toktok wantaim ol pipel na mekim awenes long wan wan haus na sapos ol i wanbel orait mipela i ken kisim nem bilong ol na bihain long narapela raun mipela i ken bringim ol veksin i kam stret long haus dua bilong ol.

Em i tok dispela program long karim COVID-19 banis sut i go long komyuniti em i namba wan long kantri.

Ol i givim 8,000 veksin tasol populesen bilong Motu Koita em i 60,000. Mipela i bai traim dispela 8,000 veksin na lukim pastaim. Sapos veksin i pinis bai mipela singaut long sampela moa,” Dadi Toka i tok.

Ol i statim dispela program long Pari viles long las wik fraide na bai ol i surik i go long ol arapela viles na pinisim olgeta komyuniti bilong Motu Koita. Ol i tok Pari Viles em i gat hevi long wara. Wara i save kam long tupela aua long wan wan de olsem na nupela pasin bilong wasim han klostu klostu em i bikpela salens tru long ol pipel.

Rebecca Negere i raitim