OL HELT opisa husat i go pas long wok bilong helt long Isten Hailans Provins i gat bikpela wari nau long pasin bilong jenerel pablik husat i no moa tingting long harim tok long lukautim ol yet na tu long banisim ol yet long sik coronavirus (COVID-19).

Dispela sik nau i wok long go nabaut long komyuniti na namba bilong ol manmeri husat i kisim dispela sik i go bikpela.

Ol manmeri i mas bihainim ol lo bilong COVID-19 long banisim ol yet. Dispela ol lo em; wasim han long sop na wara o wasim han long han senitaisa, sosel distensing, putim pes mask na stap longwe long ol narapela taim yu sik.

Isten Hailans Provinsal Helt Atoriti (EHPHA) Dairekta bilong Pablik Helt Sevis, Dokta Max Manape i tok ogenaisesen i no amamas long pasin ol manmeri i bihainim. Em i lukim ol i bung, pas na raun wantaim.

Em i lukim 30 pesen bilong ol manmeri i putim pes mask na 70 pesen i nogat.

Em i tok dispela i soim manmeri i no moa tingim seifti na helt bilong ol.

Dokta Manape i tok planti kain kain giaman tok tu i kamap na pasim manmeri long kisim marasin.

Em i tok EHPHA i putim COVID-19 veksinesen senta long Goroka Provinsal haus sik long Epril long manmeri i go kisim sut.

“Tasol planti manmeri i no kamap long kisim banis sut,” Dokta Manape i tok.

“Planti ol fran lain helt woka i no kisim banis sut tu.

Sape Metta i raitim

“Marasin i fri na i seif long kisim.

“Yu save olsem COVID-19 i kam na i stap pinis long kantri.

“Sapos yu laik volantia long kisim, yu ken go kisim.”

 Dokta Manape i tok wok bilong banisim na abrusim dispela sik i bikpela samting.

Em i tok dispela em bikos privensen i gutpela moa long yu kisim sik na traim kamap orait.