Dokta Morimai Ipai bilong Nesenel Kepital Distrik Provinsal Helt Atoriti i tok COVID-19 veksinesen em i gutpela samting na olgeta manmeri i mas kisim long gutpela bilong ol yet na ol arapela manmeri.

Em i tok, nau yet ol jeneral pablik i no bel kirap long kisim dispela veksin. Bikpela hevi nau em olsem wanem bai jeneral pablik i bel kirap long kisim dispela sut.

“Bai no gat bikpela bagarap bihain long yu kisim veksinesen. Ol moa long 30,000 lain husat i kisim dispela veksin pinis i no bin bungim bikpela sik o hevi.

“Em i gutpela samting long kisim veksin na banisim yu yet. Veksin em i gutpela bikos em i bai daunim sans bilong yu long kisim COVID-19 na dai. Sapos yu no kisim veksin yu ken kisim bikpela sik na dai. Sapos yu kisim veksin em bai banisim yu long kisim bikpela sik o dai long COVID-19,”Dokta Ipai i tok.

Em i mekim dispela tok taim Motu Koita Asembli i opim Mobail Veksinesen program long ples Pari long las wik Fraide.

Profesa Sir Isi Kevau husat i bin stap long dispela taim tu i tok, 5-pela lain long ples bilong en i dai long sik COVID-19.

“Tupela husat i dai sampela wik i  go pinis i no bin raun long bung ples o i no bin lusim ples na i long narapela hap. Ol i stap tasol long haus na ol i kisim COVID-19 na i dai. Ol pikinini na bubu bilong ol i kisim COVID-19 i kam na givim ol na ol i kisim bikpela sik na i dai,” Profesa Sir Isi Kevau i tok.

Em i tok pablik i mas harim tok na bihainim nupela pasin na tu tingim olgeta famili na pren bilong ol husat i stap long mak nogut bilong kisim bikpela bagarap long COVID-19, na tu tingim ol yet na kisim veksinesen.

Rebecca Negere i raitim