Planti lain i laik lukim ol meri i go bek long Nesenel Palamen long 2022.

Ekting maus meri bilong UN Women, Caroline Nyamayemombe i mekim dispela tok insait long wanpela bung bilong edvokesi na wokbung long kamapim ol lida meri long Sauten Rijon.

UN Women na Dipatmen bilong Komyuniti Divelopmen na Rilijen i wokbung wantaim long kamapim dispela bung.

“Planti lain i strong tru long lukim ol meri i go bek ken long Nesenel Palamen long 2022. Mipela i amamas long givim spes long ol meri i ken kam bung wantaim na kamapim edvokesi o sapot bilong ol na strongim jenda ikwaliti na tu strongim ol meri long go insait long politiks bilong PNG,” Nyamayemombe i tok.    

Ol lida meri insait long dispela bung i bin gat sans long harim ol lain husat i save mekim wokpainim, ol wokman bilong gavman na ol politisen husat i bin mekim wok long kamapim ol lo bilong apim mak bilong ol meri insait long Nesenel Palamen.

Hai Komisina bilong Australia, Jon Philp i tok, “Mipela nid long bringim ol meri long komyuniti level i go antap long Nesenel Level. Ol meri i fit long kamapim samting na kantri i nidim lidasip bilong ol.”

Ol gavman institusen i bin givim teknikol sapot na kamapim ol mesa bilong lusim spes na sia bilong ol meri long Nesenel Palamen na ol politikal pati tu. Tasol ol dispela wok mas kisim sapot bilong ol grasrut we ol lida meri na ol ogenaisesen bilong ol meri wantaim wokbung bilong ol win man na ol fitman i mas i go pas.

Rebecca Negere i raitim