BRAHMAN Sekenderi Skul long Usino-Bundi distrik long Madang Provins nau bai kamap wanpela egrikalsural skul.

Nem bilong skul tu bai senis na kamap Max David Egrikalsa Skul.

Dispela ol toksave i kamap taim Minista bilong Edukesen na lokal Memba Jimmy Ugoro i go raun wantaim Edukesen Seketeri Dokta Uke Kombra long distrik tupela wik i go pinis.

Mista Uguro i tok skul i kamap egriteknikal skul bikos Ramu Veli i gutpela graun bilong groim ol egrikalsa fam na prodak.

Em i tok distrik i laik go pas long Madang Provins olsem ples bilong kamapim kaikai na ol laipstok samting.

Em i tok skul bai kisim nem Max David Egrikalsa Skul long givim luksave long faunda bilong skul na longtaim lei misineri Max David.

David em i bikpela pes long Madang-Ramu haiwe rot we planti taim em i save ran long Toyota lenkrusa bilong em i go kam long bringim skul saplai na kaikai i go long Brahman Katolik Sekenderi.

Uguro i wanpela long ol sumatin bilong Brahman Katolik Sekenderi skul na i gat bikpela rispek long David.

Em i tokaut olsem edukesen i bikpela praioriti bilong em long distrik.

Minista Uguro i bin raun tripela-de olgeta insait long distrik bilong em, wantaim Seketeri bilong Edukesen, Dokta Uke Kombra, long wok bilong ol skul.

Minista wantaim Secretary i bin go long Gama LLG long lukluk long Kenaniz skul na ol i bin go long Bundi LLG na tokaut olsem Bundi Praimeri Skul nau bai kamap haiskul.

Uguro na Seketeri Kombra i bin go long Usino long opim nupela Korige Praimeri Skul namel long Bena long Isten Hailans na Madang Provins.

Em i tokaut tu olsem Usino Praimeri Skul nau bai kamap wanpela egri-teknikal skul.

Taim em i raun long dispela ol skul, Minista i bin givim sampela mani helpim long ol.

Em i bin givim K20,000 long ol dispela skul long kamapim ol skul laibreri na K50,000 bilong ol edministresen.

James G. Kila i raitim