EDUKESEN tasol i ken bringim senis wantaim gutpela tingting na divelopmen long laipstail na gutpela sindaun bilong ol pikinini na tumbuna long bihain taim.

Dispela em strongpela bilip bilong Edukesen Minista, Jimmy Uguro, husat i serim tingting bilong em wantaim Wantok Niuspepa.

Minista Uguro i tokaut long dispela taim em i bin opim wanpela nupela praimeri skul i stap long namel long boda bilong Isten Hailans provins na Usino-Bundi distrik.

Dispela skul em Korige Praimeri, na i bin stat enrolim ol pikinini long dispela yia tasol.

Skul i stap insait long Usino Lokal Level Gavman, namel long boda bilong Madang na Isten Hailans provins.

Minista Uguro i bin go stap long Korige wantaim Edukesen Seketeri, Dokta Uke Kombra, long opim dispela nupela skul.

Skul i stap namel long wod 9 na 20 bilong Usino LLG.

Uguro i tokaut olsem,em yet i bin statim dispela skul taim em i stap memba nating, na nau em i stap olsem Edukesen Minista, em i amamas long lukim olsem skul i statim enrolment, na i gat ol sumatin i stat skul.

Minista i bin planim wanpela yangpla kokonas long opim Korige Praimeri Skul.

Seketeri bilong Edukesen, Dokta Uke Kombra, i bin tokim ol sumatin bilong nupla Praimeri Skul olsem, Edukesen tasol i ken senisim ples bilong ol. Em i tok ol i mas lukautim dispela nupla skul Memba bilong ol na Education Minista, Uguro, i bin wok hat long bringim kamap long ples bilong ol.

Em i tokim ol papamama tu olsem, olgeta pikinini husat i gat sikspela krismas i mas go long skul, na ol papamama i no ken larim ol i stap nating long ples.

Em i tokim ol pipel bilong displa ples olsem, nau ol i gat skul pinis long asples bilong ol stret, ol i mas putim olgeta pikinini long skul.

Dokta Kombra i tokim ol skul pikinini olsem, ol i mas skul strong long wanem, ol tasol bai bringim ol sevis go insait long ples, na impruvim laip taim ol kisim save.

Sekereteri Kombra i tokim tu ol pipel olsem lokal memba bilong ol i gat bikpela intres long wok bilong edukesen, na ol i mas sapotim gut ol wok,i stat long kirap long skul insait long distrik.

James G. Kila i raitim