KAIRUKU Hiri MP Peter Isoaimo i givim K23, 000 long helpim TB (Tuberculosis) na COVID-19 awenes kempein long distrik bilong em.

MP Isoaimo, Vais Minista bilong Treseri i tok dispela sapot mani i kam long Distrik Sapot Impruvmen Program (DSIP) fand bilong spendim long long edukesen, privensen na sevim laip bilong ol pipel.

Het tisa bilong Berere elementeri skul Mary Apini long Vanapa Brown LLG long Hiri distrik i amamas long TB na COVID-19 awenes kempen Hiri Distrik Helt tim i mekim long Vanapa.

Ol lain i go pas long distrik helt tim em disis kontrol opisa Marea Beremu, helt promosen kodineta Sr Evelyn Walkai na distrik leb teknisen Nicholas Kikiwin.

Apini i tok dispela em i namba wan taim bilong kamapim TB na COVID-19 awenes long skul bilong ol na ol komyuniti i stap klostu long skul.

Em  tok awenes em i skulim na helpim ol tisa na sumatin long wanem ol sain o mak bilong dispela sik na hau em inap kamapim hevi long bodi bilong yumi ol manmeri na pikinini.

Em i tok skul bai mekim TB na COVID-19 awenes olsem wanpela sabjek bilong ol long skulim ol sumatin long abrusim sik.

Sr Walkai i tok awenes bilong TB na COVID-19 i skulim planti sumatin, tisa na ol komyuniti na ol i laik kisim moa save long hau bai ol inap abrusim ol dispela sik.

Em i tok tenkyu long disis kontrol opisa Beremu long bungim awenes bilong tupela sik wantaim.

Beremu i tok dispela tim i bin redi long ranim awenes program long taim bilong Wol TB (WTB) De long Janueri na Februeri i go inap long WTB De long Mas 24 tasol i no bin i gat fans na hevi bilong COVID-19 tu i pasim rot bilong kamapim awenes.

Tasol em i tok tenkyu long lokal MP long sapotim dispela awenes program long kamap na bai ol inap go het long mekim moa awenes long TB na COVID-19 long ol komyuniti na givim moa skul toktok long ol pipel long distrik.

Joseph Dawai i raitim