PROGRAM bilong kamapim Helti Ailan Viles long Morobe i op long Mambup Viles long wod 3 eria bilong Buang Lokal level Gavman.

Gavana bilong Morobe Ginson Saonu i bin opim dispela program. Long dispela taim ol i bin opim nupela toilet na wanpela sanitesen fesiliti aninit long Water & Sanitation Health (WaSH) Program. Ol i opim tu wanpela nupela opis bilong wod 3 long mekim dispela Helti Ailan Viles program.

 Presiden bilong Buang LLG, Yang Napo, Helti Ailan Viles Provinsal Program Kodineta Dokta Justin Ruaming na ol mausman bilong Morobe gavman i bihainim Gavana Saonu long opim dispela program.

Gavana Saonu i amamas long dispela nupela Model Toilet System we i gat septik toilet na ples bilong wasim han tu na i gutpela tru long level bilong ol ples lain.

“Em i driman bilong mi long lukim ol viles long rurel eria long Morobe provins i stap helti na klin wei long daunim ol hevi bilong helt.

“Olsem ol i save tok, abrusim sik em i moa gutpela long kisim sik na bihain gen traim long helpim yu yet gen. Taim ples em i helti, ples bai kamapim ol helti pikinini we i ken kamapim helti sosaiti na daunim ol problem i kamap long helt kea sistem bilong kantri,” Gavana Saonu i tok.

Em i tok dispela program aninit long Dokta Ruaming bai go aut long ol 33 LLG bilong Morobe provins na helpim moa long 600 viles bilong provins tu.

Presiden Yang Napo bilong Buang LLG i tok amamas long Gavana Saonu long givim K700,000 long sapotim kain program long LLG bilong en na tu long sapotim Buang Haiskul.