KLOSTU taim bai Pot Mosbi Jeneral Hausik (PMGH) i givim sevis bilong stretim sik i kamap long lewa.

PMGH inap long mekim dispela bikos long helpim bilong ol patna bilong en olsem wel na gas kampani bilong kantri, Kumul Petrolium Holdings Limited (KPHL) husat i wok long i go het long givim helpim na sapot long PMGH na ol pipel bilong Papua Niugini.

KPHL i bin givim ol sampela ikwipmen long Cardiac Surgery Unit bilong PMGH long Me 21, 2021 na long las wik Fraide ol i givim narapela moa ikwipmen long dispela yunit. Sampela moa ikwipmen bilong dispela yunit bai kam bihaintaim.

Sif Ekseketiv Opisa bilong PMGH, Dokta Paki Molumi i tok, nem bilong ikwipmen we KPHL i givim em Endoskop. Dispela ikwipmen em bilong helpim ol helt woka long lukim lewa bilong manmeri o pikinini na luksave long wanem samting i bagarap.

“Dispela ikwipmen bai helpim ol dokta long lukluk i go insait long lewa bilong sikman na i no nid long ol dokta bai katim bikpela hapskin bilong ol sikman long sekim lewa bilong ol. Ol i ken putim endoskope i go insait long bodi na ol i ken lukluk tasol long skrin na lukim na sekim wanem samting i pas na i pas long wanem hap stret,” Dokta Molumi i tok.

Dokta Molumi i tok, wantaim ol dispela ikwipmen i kam pinis long haus sik, em i kisim pinis wanpela savemen bilong ovasis ol i kolim kadiolojis o dokta bilong lewa long stretim na redim ol dispela ikwipmen bilong stretim lewa bilong ol sikmanmeri na pikinini long kantri.

“Long strongim dispela program bilong helpim ol sik long lewa, mipela i laik kisim ol bikpela save lain husat i gat save long lukautim na yusim ol dispela ikwipmen. Olsem na mipela i kisim wanpela kadiolojis i kam na em i stat pinis long mekim wok.

“Wantaim dispela dokta bilong lewa na ol masin bilong stretim sik long lewa, mipela i bai lukluk na sekim lewa na tu mipela i bai stretim wanem sik i stap long lewa. Klostu taim bai mipela i mekim dispela na helpim ol pipel long kantri. Ol pipel i no nid long i go ovasis long kisim ol dispela sevis moa,” Dokta Molumi i tok.

Rebecca Negere i raitim