EM bai nogat ol test bilong COVID-19 we ol pasindia i save kisim bipo long ol i raun long balus.

Dispela pasin bilong kisim test bilong COVID-19 wanpela de bipo long de bilong raun long balus bai stop bikos Polis Komisina na Kontrola bilong PNG COVID-19 Nesenel Pandemik Rispon David Manning i rausim dispela rikwaimen o mesa we em yet i bin putim long en aninit long Mesa namba 3 bilong Domestik Trevol.

Kontrola Manning i givim mesa namba 13 long senisim mesa namba 3 bilong Domestik Trevol long las wik. Mesa namba 13 i rausim paragrap 2.b na 2.c bilong Mesa namba 3 long Domestik Trevol.

Paragrap 2.b bilong mesa namba 3 i tokaut olsem; olgeta raun bilong balus insait long kantri i mas karim ol pasindia husat test risal bilong ol bihain long wanpela de i soim olsem ol i negetiv bipo long ol i kalap long balus. Tasol ol medivac na imejensi i no nid long bihainim dispela.

Paragrap 2.c i tokaut olsem; olgeta raun bilong balus insait long kantri i mas karim ol pasindia husat i nogat COVID-19 long bodi bilong ol.

Mesa namba 13 we i rausim dispela tupela rikwaimen bilong mesa namba 3 i tokaut olsem; Mi yet Komisina David Manning, Kontrola, wantaim ol pawa mi gat aninit long seksen 9 bilong Nesenel Pandemik Ekt 2020 na ol arapela pawa, mi mekim dispela senis olsem mi rausim paragrap 2.b na 2.c bilong mesa namba 3 na dispela senis i stat long 27 Me, 2021.

Kontrola Manning i tok moa olsem, maski em i rausim ol dispela rikwaimen, COVID-19 em i stap yet olsem bikpela birua olsem na olgeta manmeri na pikinini i mas i go het na bihainim nupela pasin long stopim sik long i go i kam.

Rebecca Negere i raitim