OL ples skul long Papua Niugini nidim kompyuta na Intanet long stat wankain level olsem ol arapela taun na siti skul long kantri.

Dispela em bikpela hevi bilong ol ples skul insait long PNG long gat ol komyuta insait long skul wantaim ful intanet netwok em bikpela samting long nau taim bilong teknoloji wol.

Wanpela Komyuniti lida bilong Kwip komyuntiti long Mul-Baiyer Westen Hailans Provins James Witi i bin tokaut long taim bilong presentesen bilong 15 kompyuta na narapela ikwipmen.

Ol Lite Haus Intenesenel Australia sariti ogenaisesen i bin donetim ol ikwipmen long skul patnasip wantaim Sir Brian Bell Faundesen. IT kampani, Niunet PNG i redim intanet sevis bilong ol long wankain apinun.

Witi husat i bin lusim skul long gret 10 i bin kamap olsem turis na go lukim Pot Mosbi i tok ol skul i gat intanet sevis i save kisim moa infomesen onlain na ol i save moa long ol ples skul.

Em i tok dispela em bikpela bris namel long ol sumatin bilong taun senta na ples bikos long nupela kompyuta teknoloji i go antap moa wantaim ol nupela infomesen long bilong amamas, sosel bung na arapela moa ektiviti long skul.

“Ol sumatin bilong ples skul i hatwok long yusim kompyuta long taim ol go insait long koles o yunivesiti,” em i tok.
Witi i tok tenkyu long ol dona na em i tok em i laikim ol tisa na sumatin long yusim ol kompyuta gut na lukautim ol.
Kaunsila na Lite Haus Intenesenel Fesilita, Peter Raim i tok planti tisa i no save long yusim kompyuta na ol skul nid long holim kompyuta klas bilong ol.