MINISTA bilong Haia Edukesen Riset Sains na Teknoloji Wesley Raminai i bin tokaut long las wik olsem NEC i makim Dokta Francis Hualupmomi olsem Ekting Seketeri na saspendim Pater Jan Czuba long Seketeri bilong Haia Edukesen.

“Mipela i no rausim Pater Jan Czuba tasol mipela i saspendim em.  Em i gat kot keis nau. Na long taim em i stretim dispela keis bilong en bai mipela kisim em bek,” Minista Raminai i tok.

“Namel long dispela saspensen taim bilong Pater Jan Czuba.  “Bai mipela wokim odit, long mani, Infomesen Teknoloji Odit na Infrakstraksa Odit long kliaim nem bilong em,” Minista Raminai i tok.

Nupela Ekting Seketeri Dokta Francis Hualupmomi tok tenkyu long Gavman long makim em long wok 3 mun Em i tok dispela bikpela salens long mekim ol dispela tripela wok long kliaim nem bilong Pater Jan Czuba.

No gat taim bilong dispela saspensen tasol ol wetim kot bilong Pater Jan long pinis pastaim long ol i ken kisim em bek.

Pater Jan Czuba i gat tupela yia moa bilong kontrak bilong em i stap.

Jacklyn Kimala i raitim