I NO GAT asua long coronavirus (COVID-19) banis sut, ekting Sif Eksekutiv Opisa bilong Isten Hailans
Provinsal Helt Atoriti Dokta Joseph Apa i tok.

Em i tok em i seif long manmeri i kisim banis sut.
Em i mekim dispela tok long taim rolaut bilong COVID-19 imunaisesen program i kamap long provins.
Em i tokim ol fanlain wokmanmeri bilong helt sekta wantaim Institut ov Medikol Risets (IMR) na ol
mausmanmeri bilong ol stekholda long provins olsem, ol i mas kisim dispela veksin o marasin bilong
COVID-19.
Dispela long wanem ol franlain wok manmeri i mas banisim ol yet bipo long ol i laik sevim ol sik manmeri
husat bai kamap long ol haus sik na ol helt senta long kisim marasin.
“Bikpela samting em putim pes mask, sosol distensing, wasim han olgeta taim na sapos i sik i mas stap long
haus na stap longwe long ol arapela.
“Dipela ol pasin bai helpim yumi long abrusim na banisim yumi yet long kisim sik,” Dokta Apa i tok.
Em i tok sik COVID-19 em i kamap pinis na em bai i stap long kantri, olsem na olgeta franlain wokman na
meri long olgeta sekta olsem helt, edukesen, polis, koreksenel sevis institusen na ol woka long olgeta
gavman ejensi husat i save wok wantaim ol pipel long wan wan level i mas kisim dispela COVID-19 veksin.
Dairekta bilong PNG Institut ov Medikol Risets Profesa William Pomat husat i bin i go pas olsem namba
wan man long kisim COVID-19 banis sut i tok planti toktok i bin kamap pinis long paulim tingting bilong ol
manmeri long i no ken kisim dispela sut.
“Tasol olsem dairekta bilong PNG IMR, mi ken tokaut klia olsem dispela marasin em i seif long kisim,”
Profesa Pomat i tok.
“Yumi i mas tingim dispela ol bikpela wok em yumi i save mekim olsem ol profesenel long sevim ol pipel
bilong yumi.
“Long dispela as yumi ol franlain woka i mas kisim dispela marasin long banisim yumi yet.”
Profesa Pomat i go moa na i tok PNG IMR i wokim ol tes, glasim gut na luksave olsem COVID-19 veksin o
marasin em i sief long kisim na i no inap kamapim ol kain kain hevi long bodi olsem ol kain kain toktok we
i wok long kamap long stopim ol manmeri long kisim dispela marasin.
“Banisim na abrusim sik COVID-19 na tu ol arapela sik em i gutpela na namba wan samting yumi i mas
mekim.
“I no gat marasin bilong kamap orait taim yu kisim COVID-19 tasol i gat marasin bilong banisim yu yet
long COVID-19 i no ken kisim yu.
“Marasin bilong banisim yu yet em Helt Dipatmen nau i wok long givim,” Profesa Pomat i tok.

Sape Metta i raitim