IS Sepik Provinsal Helt Atoriti (ESPHA) wantaim provinsal gavman i opim
pogram bilong COVID-19 banis sut rolaut long Wewak taun long Trinde 19 Me,
2021.

Gavana Allan Bird i bin go pas long kisim dispela banis sut long ai bilong olgeta
helt wok manmeri, ol gavman dipatmen, sivil sosaiti, bisnis haus na pablik.
Mista Bird i tok tenkyu long ESPHA, long wokim lonsing long pablik na olgeta
manmeri mas lukim na kisim klia ol infomesen long banis sut.
Em i tok nau nau yet i gat paul na pret i stap.
“Mi laik kisim sut ples klia long brukim tingting bilong yumi planti Sepik we i gat
tingting bilong Thomas i stap tasol yumi lusim planti manmeri long dispela taim
wantaim sik coronavirus.
“Na long gavman long kisim marasin i bin hard tru.
“Moa yet mi bin kros planti long Nesenel Gavman long pasim ol boda long
kanrti we PNG Gavman i no bin mekim,” Mista Bird i tok.
Long helpim stopim COVID-19 long kam insait long kantri Is Sepik Gavman bin
putim K1 millien long salim PNG Difens Fos 2RPIR long Moem Bareks long go
was long Indonesia Boda, long Wes Sepik Provins las yia, tasol dispela i no
stopim sik ya,” Mista Bird i tok.
Planti tok pret na tok giaman i bin kirap long ol save man na meri bilong yumi
yet long Is Sepik Provins long sosel midia na Facebook.
Bird i tok, “Mi olsem Gavana na lida bilong yuplea ol pipel bilong Is Sepik bai
namba wan man long kisim dispela sut na bihain bai olgeta franlain
wokmanmeri olsem polis, ol helt woka, ol Tisa, woklain long stua na ol arapela
husat i go pas long bring dispela sevis long provins bai kisim sut.
Gavana Bird na meri bilong em Joan Bird, bipo Siaman ESPHA BOD Mic
McCully, Wewak Taun Meya, John Nawas, Ekting ESPHA CEO Cletus Bon, na Sif

Ekseketiv Opisa Yangoru/Saussia Jacob Yafai i kisim AstraZeneca Veksin na
lonsim program.
Long dispela taim nupela Ekting Sif Ekseketif Opisa Bilong ESPHA; Cletus Bon i
tok AstraZeneka veksin i kam insait long kantri em 8,000 tasol na i no inap long
olgeta olsem Is Sepik populesen em moa long 800 tausen tasol ol i bai lukluk
long givim long ol franlain woka tasol pastaim.
Mista Bon i tok dispela sut em volunteri na i no bilong ol pikinini na ol
yangpela, ol i no inap pusim wanpela long kisim. Em is tap long wan wan man
na meri long mekim disisen na laik bilong ol yet wan wan.
Em i tok moa olsem nogat polis o ami bai bosim wanpela man o meri long kisim
dispela veksin.
Jonathan Poema i raitim