GAVMAN bilong Australia bai givim narapela moa K141, 904, 463.68 ($52 milien) long
sapotim rispon bilong Gavman bilong Papua Niugini long COVID-19 insait long kantri.

Dispela mani em bilong helpim na sapotim ol helt na edukesen sevis bilong ol pipel bilong
PNG long i go het long op na givim sevis long ol pipel.
Dispela mani bai helpim ol Kristen helt sevis long givim ol besik helt kea long ol pipel. Na
long edukesen, dispela mani bai sapotim PNG gavman long baim skul fi bilong ol praimeri
skul piknini.
Ol dispela mani sapot i kam aninit long K813.219 milien Pasifik COVID-19 Rispon mani mak
we Australia i makim long helpim ol kantri i stap long Pasifik Rijon na Timor –Leste long
menesim ol bagarap we i kamap long ikonomi bilong ol bikos long COVID-19 na tu long
strongim ol besik na ol impoten sosel sevis.
Australia i sapotim tu COVID-19 veksinesen kempen long PNG. Australia i opim wanpela
veksinesen klinik long Nesenel Kepital Distrik we ol helt woka na ol namba wan wok lain i
ken i go na kisim sut o veksin na besik trening long hap.
Australia i helpim PNG wantaim K386.192 milien tu long baim na karimaut ol sut marasin
bilong COVID-19 long kantri. Dispela i kamap aninit long Rijinal Veksin Ekses Inisitiv bilong
Australia.
Australia i mekim ol dispela pasin long wokbung wantaim ol kantri i stap klostu long ol na i
patna wantaim ol long lukautim laikim bilong Australia long ol dispela kantri na long
kamapim helti, seif na gutpela rijon long wol.

Rebecca Negere i raitim