DISPELA wik, em i wan wik nau bihain long mi kisim AstraZeneca banis sut bilong COVID 19, na mi
stap laip yet. Mi no sik, o sotwin o pilim ai raun o hetpen.

Nogat. Mi pilim liklik pen tasol long ples
we nes i bin givim sut. Em i nomol pen yumi save pilim bihain long kisim sut.
Mi no lukim wanpela ten toea i pas long han o han i hevi olsem wanpela magnet i go insait long en.
Ol dispela paul stori yumi harim em ol giaman toktok tasol. Planti lain i salim ol dispela kain toktok i
go kam long sosel midia long pretim ol mameri.
Long las wik Trinde moning, 19 Me, mitupela man bilong mi i bin go long Rita Flynn Stadium, long
Boroko, NCD long kisim dispela sut. Toksave i bin kamap niuspepa long ol pablik i ken go kisim
AstraZeneca banis sut long hap. Mipela go kamap bihain long hap pas seven moning na joinim ol
arapela manmmeri na sanap long lain. Mipela i karim wanpela fom tu we i gat toksave bilong dispela
sut na ol askim long tok Inglis. Ol manmeri i mas pulapim na karim i go wantaim. Pikinini bilong
mipela i bin salim wanpela kopi long mipela bikos em i bin kisim dispela sut long las mun.
Mi lukim planti manmeri bilong ol ovasis kantri na ol Papua Niugini manmeri. Klostu 8 klok bikpela
lain pater, sista na ol misineri bilong Katolik sios tu i kamap. Ol tu i kam sanap long lain bikos ol
sekyuriti i pasim geit na i no larim ol kar i go insait.
Mipela i wet moa long tu aua samting na san i kukim mipela gut tru, tasol geit i pas yet. Ol sekyuriti i
tok ol dokta i stap long miting yet olsem na mipela i mas wet.
Bihain long 10 klok samting, sekyuriti i opim geit. Ol i salim mipela i go long bikpela dua long fran
bilong stedium na tokim mipela long sanap gen long lain. Ol manmeri kros na bikmaus bikos mipela i
wet longpela taim tru ausait.
Narapela sekyuriti kam ausait na salim mipela go long dua long baksait bilong stedium. Mipela i kros
wantaim na tanim i go bek. Mi lukim olsem bikpela lain manmeri tru i kamap, ating 300 samting.
Long taim mipela i kamap long baksait ol i tokim mipela long bruk i go long ol ilektoret bilong mipela
na sanap long lain, Mosbi Saut, Not Is, na Not Wes. Planti komplen i kamap bikos ol manmeri i wet
longpela taim tru na sampela i givap na i go tasol sampela bilong mipela i wet yet.
Orait ol i toksave long wanem samting bai kamap long taim mipela i go insait. Namba wan samting ol
i givimaut ol fom long ol lain husat i no kisim yet. Ol i toksave olsem i tambu tru long kisim poto. Bai
mipela i lusim mobail long fran desk na bihain long kisim sut, bai ol i givim bek fon long dua bilong
kam ausait.
Ol i singautim wan wan manmeri long ol ilektoret na mipela i go insait, givim fon long wanpela opisa
na em i givim namba long yu na em i pasim wankain namba long fon bilong yu.
Insait long stedium, ol i brukim long tripela ilektoret tu we foapela foapela manmeri i sindaun long
sia na wet. Ol i givim wanpela liklik grinpela kat na yu raitim nem bilong yu.
Long taim yu kamap long las opisa, em i kisim dispela fom yu pulapim na i sekim kat bilong yu. Orait
yu wet liklik taim tasol na nes i singautim yu long kisim sut. Em i givim sut hariap na yu no pilim pen.
Em i putim plasta long han, na salim yu go sindaun na wet ten minit samting long baksait. Sapos yu
no pilim ai raun o sik bai ol i givim bek liklik kat bilong yu na toksave long wanem taim yu ken go bek
kisim namba tu sut.
Kat bilong mi i tok bai mi go bek long 14 Julai. Long taim mipela i lusim Rita Flynn Stadium, taim tu i
suruk i go painim hap pas wan.
Mi bin wet longpela taim long lain, tasol mi amamas long kisim dispela banis sut. Long Fonde, mi no
pilim wanpela hevi long bodi bilong mi. Orait long apinun mi salim teks long brata bilong mi na em i

bekim na tok em tu bai go kisim dispela sut. Long Fraide nait em i toksave olsem em i kisim sut pinis.
Em i tok em i bin wet longpela taim tasol em i amamas long kisim sut.
Dispela banis sut em i impoten bikos yu no banisim bodi bilong yu yet, bai yu helpim tu ol arapela
famili memba na ol wanwok bilong yu. I tru olsem gavman i no putim lo we bai fosim yu long kisim
dispela sut, nogat. Tasol em i wanpela rot bilong daunim bikpela hevi COVID 19 i ken kamapim long
bodi bilong yu.

Anna Solomon i raitim