OL i bin opim nupela Fekalti ov Bisnis na Infometik Dipatmen long St Benedict kempus
bilong Divine Word University long las wik Fonde long Wewak, Is Sepik Provins.

Dispela bung i bin lukim Gavana bilong Is Sepik Allan Bird; Bisop bilong Wewak Jozef
Roszynski SVD; Presiden bilong DWU Profesa Pater Philip Gibbs; Vais Presiden bilong
Akedemik Afeas Profesa Iwona Kolodziejczyk; ol sumatin na wokmanmeri bilong St
Benedict Kempus.
Dispela fekalti bai nau surukim skop bilong edukesen long yunivesiti long givim sans long
husat ol sumatin i laik stadi long provins na no ken go long Pot Mosbi o Mein Kempus
Madang long kisim kos bilong Bisnis na Infometik skul.
Vais Presiden bilong St Benedict Dokta Pater Lawerence Arockiaraj i tok dispela nupela
program bilong fekalti em wanpela bai mekim ol sumatin no ken givim infomesen tasol
kamapim trensfomesen bilong ol edukesen bilong PNG.
Pater Lawrence i tok dispela nupela Fekalti bai givim planti sans olsem ol sumatin i yusim na
lainim gut na tu long skulim na senis long fil ol laikim long bildim wok bihain taim. “Ol
sumatin i mas serim save wantaim arapela tasol ol i mas senisim edukesen long kantri,” em i
tok.
Gavana Bird i bin sapotim ol toktok bilong Vais Presiden na tok olsem dispela St Benedict
kempus long namel bilong 3-pela yia i bin wokim bikpela senis long kamapim kempus bilong
sapotim edukesen bilong ol yangpela pipel bilong nesen.
Em i tok St Benedict kempus em wanpela yunivesiti long bungim ol sumatin bilong olgeta
provins husat i save stadi wantaim. “Dispela kempus i save bungim olgeta sumatin bilong
PNG wantaim long stadi long Kaindi we kempus i stap long en,” em i tok.
Dispela kempus i bin stat long 2017 na bin gat tripela narapela dipatmen pastaim long ol i bin
opim dispela skul. Maski ol i bin opim nau tasol skul i ken lukautim olgeta sumatin bilong
narapela provins.
Dispela Bisnis na Infometik Fekalti bai statim enrolmen long stat bilong namba tu semesta
bilong dispela yia wantaim bachelor na diploma kos.