OLGETA franlain wok manmeri i mas kisim banis sut na banisim ol yet pastaim.

Em tok Ekting Sif Eksekutiv Opisa bilong Isten Hailans Provinsal Helt Atoriti Dokta Joseph Apa husat i bin mekim taim em i lonsim rolaut bilong COVID-19 imunaisesen program long provins i no longtaim i go pinis.

Dokta Apa i tokim ol franlain wokman na meri bilong helt sekta wantaim PNG Institut ov Medikol Risets (IMR) na ol representativ bilong ol stekholda long provins olsem, ol mas kisim dispela veksin o marasin bilong COVID-19, long wanem, olsem ol franlain wokman na meri, ol i mas banisim ol yet pastaim bipo long ol bai lukluk long sevim ol sik manmeri na pikinini husat bai kamap long ol haus sik na ol helt senta long kisim marasin.

“Bikpela samting em pes mask, sosol distensing, wasim han olgeta taim (nu nomol) na nau em veksin o banis sut. Dispela ol pasin em bai helpim long yumi i ken abrusim na banisim yumi yet tu long kisim sik COVID-19”, Dokta Apa i tok.

Em i tok sik coronavirus o COVID-19 em i kamap pinis na em bai i stap long kantri, olsem na olgeta franlain wokman na meri long olgeta sekta olsem helt, edukesen, polis, koreksenal sevis institusen na ol woka long olgeta gavman ejensi husat i save wok wantaim ol pipel long olgeta level i mas kisim dispela COVID-19 veksin o marasin.

Dairekta bilong PNG Institut ov Medikol Risets Profesa William Pomat husat i bin i go pas olsem namba wan man long kisim COVID-19 marasin i tok, planti toktok i bin kamap pinis long bagarapim tingting bilong ol man na meri long i no ken kisim dispela veksin.

“Tasol olsem dairekta bilong PNG IMR, mi i ken tok klia olsem dispela marasin em i seif long kisim. Na tu yumi i mas tingim dispela ol bikpela wok em yumi i save mekim olsem ol profesenol long seivim ol pipel bilong yumi. Long dispela as yumi ol franlain woka i mas kisim dispela marasin long banisim yumi yet pastaim,” Profesa Pomat i tok.

Em i tok moa olsem PNG IMR i wokim ol tes, i glasim gut na luksave olsem COVID-19 veksin o marasin em i seif long kisim na i no inap bringim ol kainkain hevi long bodi olsem ol kainkain toktok we i wok long kamap long stopim ol man na meri long kisim dispela marasin.

“Banisim na abrusim sik COVID-19 na tu ol arapela sik em i gutpela na namba wan samting long mekim long banisim yumi long dispela ol sik. Banisim sik em i gutpela long stretim sik. COVID-19 em i nogat marasin long oraitim, tasol em i gat marasin long banisim”, Profesa Pomat i tok.

Sape Metta i raitim