CANE Kontraksen Limited (CCL) i bin namba wan long sapotim ol Sauten Hailans Medikol Sumatin Asosiasen wantaim K10, 000 long helpim ol wokim moa mani mak K2.5 milien long baim kompyuta Tomography Scanning Masin (CT Scan) bilong Mendi Jeneral Haus Sik.

Dispela em hap bilong kopret sosel wok olsem 100 pesen nesenel ona konstraksen kampani long givim bek long komyuniti.

Projek Divelopmen Menesa bilong CCL Mista Willie Dus i bin presentim sek long Sauten Hailens Sumatin Yunien Presiden Johnathan Kila long Medikol Fekalti kempus long Pot Mosbi long las wik.

“Dispela visen bilong baim CT Scan Masin bilong Sauten Hailans Provins haus sik em ekselens wan bikos dispela ol masin bai sevim planti laip.” Mista Dus i tok.

Em i tok CT Scan masin em gutpela bikos dispela i ken helpim ol medikol profesenel long helpim ol sik manmeri na edminista gut tritmen we ol Sauten Hailans pipel i nidim nau.

Presiden Johnathan Kila i bin makim olgeta UPNG SHP Sumatin Yunien long kisim sek long Willie Dus.

Dispela em pait long sevim ol laip bilong Sauten Hailans olsem mipela bin statim na mipela i amamas long Cane Kontraksen Limited long sapotim.

“Dispela bai longpela rot long wokim moa mani long baim dispela CT Scan masin na mipela bai yusim dispela K10, 000 bilong CCL long statim dispela wok,” Johnathan Kila i tok.

Presiden bilong SHP Sumatin Asosiasen Felix David i tok tenkyu long CCL long sapotim dispela plen bilong ol Medikol Fekalti Sumatin bilong SHP.

Em i tok dispela sapot i helpim ol long statim bisnis wok bilong ol na traim wokim moa mani long baim CT Scan masin.

Jacklyn Kimala i raitim