OL sumatin long Is Sepik Provins i ken amamas skul bai i kamap isi nau wantaim satalait.

Long Mande dispela wik Provinsal Edministreta bilong Is Sepik Dokta Clement Malau i sainim wanpela agrimen wantaim Kacific na Kinect Ltd long putim 40 satalait dis we bai i karamapim olgeta hai skul na ol junia hai skul long provins.

Dispela ol satalait bai i helpim long bringim ol metirel bilong lainim ol sumatin long intanet.

Gavana Allan Bird i tok, Is Sepik gavman i save lusim K120 milien olgeta yia long edukesen. Dispela em i moa long hap bilong baset bilong provins. Tasol ol sumatin i no save kisim gutpela mak.

Em i tok tromoi moa mani long edukesen i no givim mipela gutpela risalt mipela i nidim. Olsem na mipela i mas kamap wantaim wanpela smatpela rot we i no kostim bikpela mani long trekim progres bilong ol sumatin.

“Mipela i bin kisim tripela yia long mekim dispela driman tingting o visen i kamap tru.

“Mipela i bin givim wok long JaiveX long kamapim wanpela E-Learning Pletfom long bringim gut ol metirel bilong lainim bilong ol pikinini bilong mipela long intanet.

“Taim dispela program i redi mipela i bin nidim wanpela intanet infrastraksa we kost bilong en i no antap tumas long bringim dispela program. Gutpela tru long Kacific i lonsim satalait bilong en las yia na teknoloji bilong ol i fit gut tru wantaim visen bilong mipela,” Gavana Bird i tok.

Wantaim helpim bilong Kacific Is Sepik gavman bai i putim olgeta hai skul na junia hai skul bilong en long intanet.

Gavana Bird i tok tu olsem long pinis bilong yia ol i hop long givim ekses long olgeta praimeri skul bilong ol tu. Ol sumatin long May River, Karawari, Maprik na Wewak bai i gat ekses long wankain kwaliti sans bilong lainim. Lukluk i go longwe long bihaintaim ol bai i rausim nid bilong printim ol metirel.

Is Sepik Gavman bai i baim olgeta metirel bilong ol sumatin long lainim long intanet.

Long ol pablik ol i ken yusim intanet tu tasol ol bai i baim.

Dispela wok i kostim Is Sepik gavman K2 milien na mani i kam aut long PSIP fand. Long ranim dispela 40 satalait sistem em bai i kostim ol K150 tausen long wan wan yia.

Gavana Bird i ting dispela sistem bilong skul bai i stat wok long Julai.