LONG taim Goroka taun long Isten Hailans i stap yet long amamas bilong 2020 bai-ileksen, sik coronavirus (COVID-19) i kamap pinis long provins na i wok long raun.

Isten Hailans Provinsal Edministresen (EHPA) wantaim Isten Hailans Provinsal Helt Atoriti (EHPHA) i save olsem COVID-19 i stap pinis long provins na wok bilong daunim kamap bilong dispela sik i mas strong long provins.

Ol senia opisa bilong EHPG na EHPHA i bin sindaun long wanpela miting long las wik i go pinis na i kamapim strongpela toktok bilong kisim helpim i kam long Nesenel Gavman wantaim Nesenel Dipatmen bilong Helt (NDoH) long daunim kamap bilong COVID-19 long provins.

Istan Hailans Provinsal Edministreta John Gimisive husat i siaman long dispela miting i tok provins i nidim sapot long sait bilong fanding.

Em i tok sapos dispela sapot i no kamap, planti manmeri long komyuniti bai kisim bikpela bagarap long COVID-19.

Sif Eksekutiv Opisa (CEO) bilong EHPHA Dokta Joseph Apai i surukim dispela tok na i tok COVID-19 i stap pinis long provins na helt bilong wan wan manmeri i stap long han bilong ol.

Em i tok long abrusim dispela sik, ol i mas bihainim lo bilong Nupela Pasin.

Dispela em pasin bilong wasim han olgeta taim, putim pes mask taim ol i raun, stap 1.5 o 2 mita longwe long ol arapela, taim i kus i mas kus i go insait long hanskru, na sapos ol i sik ol i mas stap tasol long haus na i mas stap longwe long ol arapela.

“Taim yumi lukim olsem sik em i stap pinis, yumi mas wok strong long ol eria we yumi i bihainim ol lo long banisim yumi yet long kisim dispela sik,” Dokta Apa i tok.

Em i tok nau yet ol helt senta na ol komyuniti helt pos long 8-pela distrik  i wet tasol long kisim helpim long Nesenel Gavman long karimaut wok bilong ol.

Sape Metta i raitim