MEMBA bilong Madang na Jastis Minista, Bryan Kramer i tokaut long midia olsem disisen bilong rausim ol kar long han bilong polis i stap long han bilong bos bilong ol yet, em Polis Komisina David Manning.

Em i tok em i nogat wanpela tok long polis long Madang taim Komisina i mekim dispela disisen.

Kramer it ok ol kar nau i stap aninit long lukaut bilong Madang Distrik Divelopmen Atoriti.

Ol i kisim dispela ol kar bihain long Polis Dipatmen i bin putim mani wantaim Madang Distrik Divelopmen Atoriti long baim ol long las yia, tasol tupela long ol i bagarap bihain long ol i bin bam long rot.

Ol polis manmeri long sampela wik i go pinis i bin kamapim tingting olsem, Kramer i mas tok sori long ol, long rausim ol kar long ol, tasol Asisten Polis Komisina bilong Noten Komand, Peter Guinness, i bin tok dispela i no stret.

Em i tok ol polis yet i asua.

Guinness i tokim ol polis manmeri olsem, ol i mas i gat pasin bilong lukautim ol samting.

Em i tokim ol polis manmeri long lusim dispela tingting o toktok bilong ol i no laik long kisim bek ol kar, we ol nau i stap long lukaut bilong Madang DDA.

James G. Kila i raitim