MASKI kain kain tok win olsem banis sut bilong coronavirus (COVID-19 bai bagarap laip bilong ol manmeri taim ol i kisim dispela sut.

Tasol dispela i no pasim wok bilong Isten Hailans COVID-19 Provinsal Helt tim long go het long wok bilong ol na givim sut long ol manmeri.

Isten Hailans Provinsal Helt Atoriti (EHPHA)  Sif Ekseketiv Opisa Dokta Joseph Apa i bin kamap na lonsim COVID-19 imunaisesen rolaut program.

Em i askim ol helt woka long ol distrik insait long provins long kisim dispela sut taim imunaisesen tim i go long hap bilong ol.

“Mi askim yupela ol franlain helt woka long provins long kamap na kisim dispela sut,” Dokta Apa i tok.

“Dispela bai bainisim yu, famili bilong yu, ol wan wok bilong yu na ol arapela lain husat i kam long kisim helpim bilong yu.”

Bihain long rolaut bilong COVID-19 imunaisesen lonsing, inap long 38 ol helt wok manmeri long provins i kisim pinis dispela banis sut.

Ol i tok ol i no pilim wanpela samting bihain long ol kisim dispela banis sut.

Ol opisa bilong Isten Hailans Provinsal Helt Atoriti (EHPHA) na Institut ov Medikol Risets (IMR) i kisim banis sut long banisim ol yet.

Ol distrik helt menesa bilong 8-pela distrik long provins olsem Kainantu, Okapa, Lufa, Obura/Wonenara, Henganofi, Unngai/Bena, Daulo na Goroka yet wantaim ol sapot woka bilong ol i bin kamap na kisim dispela banis sut.

“Bikpela tingting em bilong mipela i givim dispela COVID-19 veksin long ol franlain helt woka, bikos ol bai go pas long wok wantaim ol sik lain husat i save kamap long kisim helpim long ol.

Mipela i mas givim marasin long ol bipo long ol i go aut na mekim wok bilong ol long ol bikpela haus sik na helt senta long provins,” Dairekta bilong Institut ov Medikal (IMR) Profesa William Pomat husat i bin i go pas long kisim dispela sut i tok.

Em i tok dispela marasin em i seif long kisim, long wanem, taim ol franlain helt woka i kisim sut, dispela bai i helpim long banisim ol long ples bilong wok, pablik ples na long ol haus bilong ol tu.

Em i tok ol lain manmeri husat krismas bilong ol i 40 na i go antap i mas kisim dispela sut long wanem dispela bai strongim helt na banisim laip bilong ol.

Sape Metta i raitim