Tsliti-tsili Praimeri Skul long Wampar Lokal Level Gavman bilong Huon Galp Distrik i bin kisim sapot long Gavman bihain long 45 yia.

Dispela Praimeri Skul insait long Wampar Lokal Level Gavman nau i luksave long graun bruk seremoni bilong nupela 4-pela rum insait long 1-pela klasrum bilding.

Gavana bilong Morobe Ginson Saonu i bin kamap long dispela taim long lukim pinis bilong nupela klasrum bilding long apim edukesen standet bilong dispela hap.

Ol lokal pipel insait long komyuniti yet i bin bungim mani long las 40 yia long wokim ol haus bilong tisa na klasrum wantaim. Dispela skul i stap long Lowa Watut eria we i no gat gutpela luksave bilong gavman sevis na sapot long planti yia.

Gavana Saonu i tok dispela em hap wok bilong Gavman long bringim kwaliti besik edukesen go insait long ol rurel ples bilong Morobe provins.

Ol bai stat bildim dispela klasrum bihain long ol muvim olgeta timba na samting bilong wokim klasrum go long viles na konstraksen wok bai stat. Kontrakta wokman Robert Mairob bilong Maroibs Konstraksen bai pinis insait long 3 o 4 mun taim.

Gavana Saonu i bin askim ol lokal long rispektim ol konstraksen wokman bai ol i ken wokim klasrum gut na pinisim.

Em i tok dispela blesing bilong ol pipel i karim kaikai bikos ol yet i bin hatwok long wokim dispela skul.

Kaunsila bilong Wot 25 bilong Wampar LLG Tony Giowen i bin apim lidasip wok bilong Gavana Saonu na i tok olsem dispela em namba wan taim Gavana i wok klostu wantaim ol lida bilong tripela level bilong Gavman na ol pipel nating long pulapim ol divelopmen ajenda.

“Tenkyu long namba wan taim olsem Gavana i bin sapotim mipela wantaim Wod Divelopmen Grants bilong K5, 000 las yia na narapela K5,000 long dispela yia 2021.”

“Mi bai yusim dispela K5, 000 long apgretim ol lokal Eitpos we gavman i no luksave long las 8-pela yia,” em i tok.

Lokal Lida Ben Elisha i tok tenkyu long Gavana Saonu long givim taim na sapotim ol papapmama na komyuniti long strongpela sapot long tupela sait wantaim em fainensal na risos long lukautim skul inap planti yia.