MEMBA bilong North Fly James Donald i bin givim K100,000 sek mani long wanpela elementri skul long Kurinty viles insait long South Fly ilektotret long bildim nupela klasrum bilong skul.

Long wokabaut bilong Donald insait long South Fly ilektoret em i bin go wantaim Gavana bilong Westen Provins Taboi Awi Yoto na Memba bilong South Fly Sekie Agisah husat i nau Sivil Aviasen Minista long vile sol kolim Kurinty long South Fly Distrik bilong Westen Provins.

Donald i tok dispela sapot bilong mani long divelopim ol elementri klasrum insait long South Fly Distrik na luksave long ol pikinini bihain taim.

“Mi amamas long givim dispela kain long Kurinty viles na bildim nupela klasrum bikos dispela ples i bin groim mi na kamap long dispela level,” Donald i tok.

“Nau em taim bilong mipela long luksave long wan wan ples na ilektoret bilong mipela na stat wok bung wantaim long divelopim ol plen bilong mipela insait ples na komyuniti wantaim,” Donald i tok.

Em i tok dispela wok misin bilong sevim ol pipel bilong tupela ilektoret na bungim tupela ilektoret wantaim olsem wanpela famili aninit long lidasip rilesensip.

Em i tok edukesen em ki bilong laip na wanem kain rot bai ol bihainim long apim mak bilong edukesen insait long tupela ilektoret wantaim.

“Mipela laik stretim faundesen bilong ol pikinini bihain long ol go antap long narapela mak bilong edukesen,” em i tok.