OL 615 Sauten Hailans sumatin we ol i stap aninit long sponsa bilong Gavana bilong ol, William Powi i greduet las wik Trinde long Mapex Trening Institut (MTI) bilong Lae.

Dispela em ol namba wan lain sumatin long kisim dispela sponsasip bilong Gavana bilong Sauten Hailans Provins (SHP) we i stat long las yia we Powi i statim wantaim MTI long olgeta hap bilong PNG.

Dispela ol sumatin i greduet wantaim setifiket bilong operetim Ekseveta, Lait Moto Kar, Mobail Krein, Dam Trak, Foklif na Semi Trela.

Mista Rodney Wane, mausman bilong ol Sauten Hailans sumatin long Lae MTI kempas i tok olsem, dispela em wanpela bikpela sans tru we Gavana bilong ol i givim ol.

 Namel long dispela 615 husat i gredueit, 25 em ol meri.

Stephanie Kuna em wanpela meri husat i greduet wantaim setifiket bilong operetim Krein i tok, “Nau mipela ol meri tu i ken wokim wok we bipo ol man tasol i save wokim. Mipela i kisim skul na prektikol wantaim long wokim dispela kain wok.”

Long dispela greduesen ol sumatin i kisim setifiket wantaim pemit bilong operetim ol masin na skul refens long helpim ol long painim wok.

Mista Wane i tok olsem Gavana Powi i luksave long ol, ol pipel bilong em i kam stap long Lae na ol narapela hap bilong PNG na em i mekim samting long helpim mipela.

Dairekta bilong Lae Mapex Kempas i tok, “Mipela i givim olgeta samting long ol seim taim, olsem bai mekim isi long ol long painim wok hariap.”

William Powi i save sponsaim ol sumatin tu husat i save go kisim skul long ol teseri institusen insait long PNG na ol arapela teknikol skul.

Mapex em wanpela bilong ol institusen we Gavana Powi i givim K200 milien sponsa long ol Saunten Hailans sumatin husat i stap long wanem hap long PNG we bai i ken go skul long operetim ol masin long kempas i stap klostu long ol.

Mista Wane i tok, “Dispela em bikpela samting tru long mipela na mipela i tok bikpela tenkyu na tok amamas bilong mipela i go long Gavana bilong mipela William Powi na Mapex Trening Institut long giving taim long mipela ol manmeri i stap nating long kisim sampela save long mekim wok mani na helpim mipela yet na kantri bilong yumi.”

Penelope Aimari i raitim