WANPELA Pos Masta sumatin bilong Mekenikol Enjinia Dipatmen long PNG Univesity of Technology Peter Oyekola i bin winim namba wan ples kompetisen long taim bilong Indastrial Enjinia na Operesen Menesmen (IEOM) konferens we i bin kamap long Singapore stat long 9 i go pinis long 11 Mas 2021.

Taim em bin stadi long Unitech las yia, (2020) Mista Oyekola i bin pinisim Masta risets bilong en aninit long Dokta Aaezeden Mohamed na leit Profesa John Pumwa.

Ol i bin salim dispela fainel risets bilong em i go long IEOM long resis long masta risets kompetisen. Bihain ol bin seleketim masta risets bilong em long presentesen na pablikesen long IEOM intenesenel konferens long Singapore.

IEOM konferens i save kamap olgeta yia na kamap ples bilong toktok long akademik, risets bilong planti indastri long senisim tingting na serim ol nau divelopmen save kamap long indastri enjinia na operesen menesmen.

Dispela bung i save bungim kain kain intenesenel masta sumatin na givim sans long wok bung na lainim kain kain samting long yusim insait long ol indastri enjinia na operesen menesmen.

Long taim bilong konperens presentesen Mista Peter Oyekolo i bin kisim namba wan ples awot bilong Masta Tisis Kompetisen het tok “Ferromagnetic climbing robot for industry flaw detection: An implementation of computer vision”.

Wantaim dispela namba wan ples Tisis awot, Mista Oyekola na supavaisa bilong em Dokta Mohamed i bin kisim moa long foapela Awot olsem Best Trek Pepa Awot. Olgeta awot na luksave makim ol Papua Niugini Unitech long intenesenel level.

Dokata Mohamed, pren, na ol Unitech wokmanmeri i tok gud lak long Oyekola long go het wantaim ol wok bilong em bihain taim. Ol i bin amamas na bai amamas moa long ol Unitech simatin long dispela intenesenel awot na luksave.

Nau mista Oyekola i stadi long Ph.D long USA long The Univesity ov Tennessee.