Polis Komisina na Kontrola bilong PNG COVID-19 Nesenel Pendamik Rispons David Manning i laikim olgeta skul na institusen long olgeta hap bilong kantri i mas bihainim strongpela lo wantaim ol mesa bilong Nu Nomol o Nupela Pasin.

Mista Manning i tokim olgeta tisa long wan wan skul na intitusen long olgeta hap bilong kantri long bihainim na strongim Nu Nomol.

“Dispela em wok bilong wan wan skul na institusen long mekim bai ol wokmanmeri na sumatin i mas bihainim mesa long Nu Nomol. Olgeta tisa na sumatin wantaim i mas werim mask olgeta taim na wasim han long sop.”

“Mi singautim ol skul na intitusen long invest long tempretsa gan long kisim tempretsa bilong ol sumatin bihain long ol i go insait long skul geit,” Manning i tok.

Mista Manning i tok keis bilong COVID-19 long kantri i go antap tru nau olsem na olgeta sitisen i mas lainim long bihainim mesa aninit long nupela pasin sapot dispela kantri i gat vaires.

Em i tok COVID-19 em tru olsem na namba bilong keis i go antap hariap na kisim laip bilong ol 107 pipel.

Em i tok gutpela nius em namba bilong sampela pipel husat i kisim tritmen na orait long COVID-19 taim 2,035 keis em stap ektiv yet.

Jacklyn Kimala i raitim