WANPELA tim long Nesenel Kontrol Senta (NCC) i stat long kisim ol swab bilong ol wokmanmeri bilong Haus Palamen long mekim tes bilong COVID-19.

Ol i mekim dispela pasin bihain long ol i painimaut olsem tes risal bilong 42 wokmanmeri long Nesenel Palamen i soim olsem ol i gat COVID-19. Sampela taim i go pinis, ol i bin kisim swab bilong 167 wokmanmeri na mekim test bilong COVID-19, long dispela, ol swab bilong 42 wokmanmeri i soim olsem ol i gat COVID-19.

 Long las wik Tunde, ol tim long NCC i stat long kisim tes bilong olgeta wokmanmeri long Nesenel Palamen inap ol i kisim tes bilong ol politikal wokmanmeri tu.

Komisina bilong Polis na Kontrola bilong PNG COVID-19 Nesenel Pandemik Rispon David Manning i tok maski Palamen sesen em i bikpela samting long ranim dispela kantri, sampela mesa i mas kamap long lukautim gut ol lida bilong kantri long sik COVID-19.

Mista Manning i givim daireksen long tes i mas kamap long ol wokmanmeri bilong Nesenel Palamen na ol wokmanmeri bilong ol Politikal Memba long Nesenel Palamen.