OL PIPEL bilong Tensiti na Bumayong long Lae nau i gat nupela haus sik.

Dipatmen bilong Helt Rural Praimeri Helt Sevis Deliveri Projek, i wokim wanpela nupela klinik long Tensiti long helpim narapela helt klinik, Tensiti Helt Klinik.

Helt klinik i kamap long wanem namba bilong ol pipel i stap long dispela ol hap i bikpela tumas.

Wok bilong dispela projek long wokim haus sik i stat long Septemba las yia. Asia Divelopmen Benk (ADB) i fandim 80 pesen bilong projek na 20 pesen bilong projek em AusAid na Gavman bilong Papua Niugini i fandim.

Dispela nupela haus sik em Pasifik Divelopmen Kontrakta Ltd i go pas long wok na i gat narapela tripela liklik kontrakta i wok aninit long en.

Dispela projek bilong nupela haus sik bai helpim planti manmeri long wanem Angau i stap longwe na tu Tensiti Helt Klinik i no bikpela na nogat gutpela helt fesiliti long en.

Peter Johns, Projek Menesa bilong Rurel Praimeri Helt Sevis Deliveri Projek i tok olsem mani mak bilong dispela projek em K9 milien na olsem 50-60 man i wok long dispela projek.

Dispela Haus Sik bai i gat wod bilong ol mama i karim bebi  na aut peisen imejensi blok na tu insait long banis bilong haus sik bai i gat sikispela haus bilong ol wok manmeri bilong haus sik.

Mista Johns tok, ‘dispela nupela haus sik nem bilong en em Tensiti Eban Klinik.

Wok bai i pinis long mun Oktoba bilong dispela yia.

Mista Johns i tok moa olsem, “ADB i fandim planti Helt projek infrastraksa insait long PNG olsem long Ambunti long Is Sipik, Pomio long Wes Nu Briten na Daru long Westen Provins tasol dispela projek hia long Lae em i bikpela hap bilong dispela projek.

“Dispela nupela haus sik i kirap long taim bilong coronavirus olsem na ol bai i bihainim ol COVID-19 protokol na tu wokim haus sik long inapim ol protokol.  Olsem na haus karim bai i stap bilong em yet na autpeisen klinik bai i stap bilong em yet na bai i no join olsem wanpela bilding.

Mista Johns i tok, “Dispela haus sik bai helpim tru ol mama long no ken go longwe moa long Angau Memorial Haus Sik long karim pikinini.”

ADB i wok yet long fandim ol narapela narapela ol projek insait long PNG.

Penelope Aimari i raitim