BIKNEM turis bisnisman na pastaim Helt minista, Sir Peter Barter long las wik i tokaut olsem Melanesian Foundation i helpim long printim wanpela liklik buk we i gat ol gutpela infomesen long dispela sik nogut COVID-19 o coronavirus.

Sir Peter, husat em pastaim rijinol MP bilong Madang em yet em i siaman bilong Melanesian Faundesen na dispela non gavman ogenaisesin i save helpim planti ol rurel komyuniti na ol lain i nidim helpim kamapim gutpela sindaun na ol sosel sevis long komyuniti.

Em i tokaut olsem dispela liklik buk em wanpela biknem PNG medikol dokta, Dr Glen Mola, i bin tanim tok i go Tok Pisin na em i isi long ol liklik manmeri long ples i ken ritim na save gut wanem ol infomesen long helpim ol yet.

Moa long en tu dispela liklik buk bai mekim isi long ol pipel i ken save gut o klia gut long sik coronavirus na wanem rot long abrusim na banisim ol yet long kisim dispela sik.

Sir Peter i stat pinis long givim aut dispela nupela liklik infomesen buk i go long ol pipel insait long  ol komyuniti.

Em i toktok strong tu olsem, sik coronavirus o COVID-19 em i no sik bilong ol waitman tasol.

Sir Peter i tok, dispela sik i kisim pinis olgeta kala skin manmeri long ples graun, na sapos yumi no lukautim yumi yet gut, yumi tu bai ken kisim dispela sik.

Sir Peter i tok strong tu olsem Madang i mas hariap long kisim ol AstraZeneca veksin i kam long provins.

Em i tok olsem, sik i no save wetim wanpela man, meri o pikinini na em i no save skelim yu wanem kain man o meri long kamap.

Sir Peter, husat tu em i patron bilong Institute of Medical Research (PNGIMR) i tokaut olsem, em yet i kisim sampela bikmanmeri pinis i go long Mosbi long kisim dispela sut long wanem Madang i no gat yet long dispela taim.

James G. Kila i raitim

Em i tokaut tu olsem, em yet tu i kisim dispela sut pinis, na i no pilim wanpela side effect bilong em, maski em i bin kisim liklik het pen.

Sir Peter i tok olsem, ol lain em i helpim ol em ol lapun manmeri tasol olsem, Presiden bilong Divine Word University, Profesa Pater Phil Gibbs, Maureen Hill, na Asbisop bilong Madang Katolik Sios, Anton Bal.

Dispela wik em i tingting long kisim sampela lapun bilong Krangket Ailan i go long Mosbi long kisim dispela sut tu.