KUMUL Petroleum Holdings Limited (KPHL) i givim narapela moa sapot bilong ol medikol ikwipmen i go long Pot Mosbi Jeneral Haus Sik (PMGH) long sapotim pait bilong daunim COVID-19.

KPHL i givim 20 pam bilong sut, 20 infusen pam, 20 pals oksimita na 20 dijital blut presa masin we ol i bam long wanpela kampani ol i kolim GREEN TeleMed. Prais bilong olgeta ikwpimen em K344, 120.66. Ol dispela ikwipmen bai helpim ol dokta na nes long PMGH long givim gutpela helt kea long bikpela namba bilong COVID-19 keis we i nidim kea na i stap long Intensiv Kea Yunit (ICU).

“Intesniv Kea Yunit i save nidim ol masin bilong sekim sapos lewa wok gut na lang (tupela beg is tap long bros we i save pulim win na rausim win) na ol ventileta o masin bilong pulim win long helpim sikmanmeri long pulim win. Ol medikol ikwipmen i kam long KPHL, i kam long gutpela taim tru na ol planti sikmanmeri husat i kam long Aisolesen Wod i bin yusim na nau tu ol lain husat i stap yet i wok long yusim i stap.

“Taim namba bilong COVID-19 i wok long i go antap, i gat bikpela nid long planti ikwipmen. Sampela bilong ol dispela ikwipmen we mipela i nidim em, pam bilong sut we i save sekim na givim raitpela namba bilong ol marasin long sikmanmeri. Ol infusen pam i save sekim na givim raitpela namba bilong wara. Pals oksimita i save sekim hamas win i go insait long bodi na blut presa masin i save sekim blut,” Sif Ekseketiv Opisa bilong PMGH, Dokta Paki Molumi i tok.

Menesing Dairekta bilong Kumul Petroleum Wapu Sonk i tok, “Long stat bilong COVID-19 pandemik, Kumul Petroleum i givim han na sapotim wok bilong gavman long daunim COVID-19. Bihain long wanpela yia i kam i go, mipela i luksave olsem i gat bikpela nid long sait bilong ol medikol ikwipmen olsem na mipela olsem wel kampani bilong Papua Niugini mipela i lukim dispela nid na i go het long sapotim wok bilong daunim COVID-19.”

“Mipela i amamas long givim ol dispela ikwipmen long helpim ol manmeri long Papua Niugini husat i kam long dispela haus sik long kisim kea long ICU,” Mista Sonk i tok.

KPHL i bin tokaut long sapot bilong en long daunim COVID-19 long las yia long Mas 27, 2020. Na long dispela taim i kam inap nau, ol i givim ol ikwipmen we mani mak bilong ol i K5.447 milien. Dispela i abrusim komitmen ol i mekim long sapotim pait bilong COVID-19 wantaim K5 milien tasol.

Sif Ekseketiv Opisa bilong PMGH, Dokta Paki Molumi i tok, tude (28/04/21) i makim 278 de bilong COVID-19 kea long PMGH taim namba wan sikman bilong COVID-19 i bin i go kisim helpim long PMGH. Lukluk i go bek, 300 COVID-19 sikmanmeri i go kisim helpim long Aisolesen Wod bilong PMGH. I gat 45 sikmanmeri bilong COVID-19 i stap yet long haus sik we 8-pela i kisim bikpela bagarap na i stap insait long ICU.

Rebecca Negere i raitim