KISIM skul onlain em wanpela nupela pasin we olgeta sekenderi skul i mas traim long mekim long taim bilong coronavirus, Serah Tapo, Prinsipel bilong Luteran Sekenderi Skul long Lae i tok.

Misis Tapo i toktok strong long olgeta mamapapa bilong ol sumatin bilong em i mas painim wanpela smatfon bilong ol pikinini bilong ol long kain taim olsem.

Em  i tok, “COVID-19 i mekim na mipela i stap bihain stret long ol lesen bilong mipela. mipela i no save wanem taim ken bai gavman i tok long pasim skul ken, olsem na ol sumatin i mas gat smatfon long helpim mipela i bihainim lesen gut onlain taim skul i pas.”

Misis Tapo i tok olsem, ol gat gutpela Infomesen Teknoloji (IT) tisa i stap pinis na bai i ken helpim ol sumatin bilong ol na ol tisa bilong ol long yusim Google klasrum onlain long skul sapos skul i pas.

Misis Tapo i tok, “Google klasrum em rot bilong yumi nau na ol sumatin long i bihainim sapos skul i pas gen. Em i wanpela bilong ol nupela pasin wankain yumi kisim pasin bilong werim mask.”

Skul edministresen i toktok strong long ol sumatin na ol tisa long kam long Prinsipel na Deputi Prinsipel Akademik husat em IT tisa bilong Bumayong Sekenderi skul long kisim moa skul long hau bai ol i ken go het na yusim Google klasrum sapos skul i pas.

Em i tok, “Mipela mas redi bikos coronavirus em i kam bilong stap na sapos namba i go bikpela ken long Lae ol bai pasim gen ol skul olsem na mi laik ol papamama bilong ol sumatin na ol tisa bilong mi long luksave long kain samting olsem, na taim skul pas mipela bai hariap tasol statim wantaim onlain skul.”

Misis Tapo i tok moa olsem, yes i gat planti hevi bilong onlain lainim wantaim ol pikinini tasol mipela mas go het na mekim bikos sapos mipela larim tasol, ol sumatin bilong mipela bai kisim bagarap long skul.

Deputi Prinsipel Mista Botoni i tok, “Nau yet ol kompyuta bilong mipela i daun, na mipela wok yet long stretim, taim mipela stretim ol pikinini i ken kam na yusim, tasol nau yet em bikpela samting long ol sumatin long gat smatfon.”

Misis Tapo i tok, “Em bai bikpela mani papamama i tromoi long baim fon kredit na baim fon tasol skul bilong ol pikinini bilong yumi long kain taim olsem, em bikpela samting na yumi mas senis bihainim nupela pasin long stap gut.”

Penelope Aimari i raitim