DISPELA Nesenel Aisolesen taim i bin pinis long Mande tasol COVID-19 awenes na enfosmen operesen long siti bai go het yet,” NCD Provinsal Pandemik Kontrola Benard Kipit i tok.

Mista Kipit husat i Siti Menesa tu i tok stat long nau dispela kantri rekot bilong COVID-19 i stap long 10,197 positiv keis wantaim namba bilong i dai em 91.

 Namel long dispela ol COVID- 19 positiv keis namba bilong NCD i go antap tru long 4,123 keis na 61 i dai, em i tok.

Em i tok ol skul i bin stat long Mande 19 Epril 2021 tasol ol komyuniti trensmisin i go antap yet.

Em i tok ol malti-stekholda long siti bai holim na strongim dispela operesen bilong Nesenel Pandemik Oda.

Kontrola bilong NCD Kipit i singautim olgeta siti pipel na arapela pipel bilong klostu hap bilong Sentral na Galp provins long luksave na bihainim COVID-19 protokol.

Em i tok COVID-19 vaires em kam long stap olsem na ol protokol mas kamap hap bilong laipstail bilong yumi.

Nesenel Rot Trenspot opisa bai rot blok long sampela hap bilong siti long sekim ol PMV bas, teksi na ol jeneral pablik, skul pikinini i mas werim mask, sindaun o stap longwe long narapela na wasim hap olgeta taim.

NCD Gavana Powes Parkop i amamas long ol skul pikinini na pipel long wok wantaim ol operesen tim long las foapela wik, dispela gutpela pasin i mas go yet. Na tu bikpela tenkyu long ol stekholda long gut wok i bin kamap long dispela taim bilong pandemik.

“Dispela gutpela pasin na wok bung bilong ol sumatin na pablik bai helpim long pinisim pandemik. Ol medikol tim bai helpim ol husat i kisim dispela vaires. Olsem na olgeta sumatin na tisa i mas bihainim COVID-19 protokol long daunim namba bilong keis.

Olpela Metropolitan Superintendent Ben Turi i tok long stat bilong skul i soim moa muvmen bilong pipel, pikinini wantaim papamama bilong ol we i kamap bikpela salens long ol.

NCDC Urban Safety Dairekta, Paul Komboi i tok ol bai apim operesen plen bilong ol long wok wantaim ol hevi long graun inap olgeta siti pipel bung wantaim dispela COVID-19 mesa.