Divine Word Yunivesiti (DWU) i bin sainim MOA wantaim PNG Kastoms long surukim divelopmen program wok bilong ol long las wik.

Dispela divelopmen program we DWU i bin givim long groim ol profesenel wok manmeri bilong Kastoms sevis insait long kantri.

Presiden bilong DWU Profesa Pater Philip Gibbs i tok as tingting bilong dispela patnasip em long helpim ol wok manmeri bilong kastom sevis long yusim ol kwaliti rios bilong yunivesiti na kamap profesenel na save moa long wok bilong ol insait long kantri.

“Mipela i bin sainim dispela MOA stat long 2013 na nau em faivpela yia we i bin prodaktiv tru na soim long 2017 taim ol namba wan pipel i bin greduet wantaim Diploma long Kastom Stadi,” Profesa Pater Philip Gibbs i tok.

Deputi Komisina bilong Boda Sekyuriti  Benjamin Sine i tok tenkyu long DWU long sapotim ol wantaim dispela program long muv fowat na kamapim kwaliti profesenel pipel insait long Kastoms sevis.

Em i tok tenkyu tu long husat i stap beksait na sapotim dispela program long gro bikos long dispela program ol i bin wokim planti gutpela samting.

Maski hevi bilong COVID-19 i go antap tasol DWU na PNG Kastoms i givim taim long sainim dispela MOA gen long surukim wok bilong tupela long ol narapela yia.

Long nau mipela i luk fowat long wok bung wantaim na kamapim profesenel standet bilong olgeta pipel husat i laik stadi long kisim Diploma.

Jacklyn i raitim