I NO olgeta de ol pipel husat i go i kam long haus sik i save soim amamas bilong ol long ol lain bilong wasim londri bilong haus sik.

Wantok Niuspepa i amamas tru long kisim dispela stori bilong John Kimbuna wanpela helt trening sumatin long Kundiawa haus sik. Long piksa Misa Kimbuna i sanap wantaim Maria Danian na Paula Senis, tupela mama husat i save wasim londri bilong Kundiawa Jeneral Haus Sik.

Tupela mama i amamas tru long soim nupela yunifom bilong tupela.

Olgeta long wanpela wik, em 7-pela de olgeta Maria Danian, Paula Senis na wanpela narapela meri i save wasim ol betsit na ol arapela samting ol dokta na nes i save yusim long wok long ol sikmanmeri.

Nau em i namba wan taim wanpela i luksave long ol mama long londri na ol i amamas long kisim poto tu.

Kundiawa haus sik em i wanpela bikpela haus sik long Papua Niugini.