Mekim planti test, kamapim planti aisolesen senta na kisim banis sut bilong COVID-19 em ol tripela samting Siaman bilong IMR, bipo Minista bilong Helt, bipo Gavana bilong Madang na bisnisman Sir Peter Barter  i laik i mas kamap long kantri long sevim laip bilong ol tausen pipel.

Em i tok COVID-19 em i no sik bilong ol waitman tasol na bai no inap long holim ol PNG lain, nogat. Em i tok, dispela sik i save stap long win na ol manmeri i save karim raun long bodi bilong ol na em i save kalap i go i kam long wanpela na narapela.

“Maski ol i toksave gut pinis long yumi long ol mesa bilong abrusim dispela sik olsem stap longwe long narapela, werim pes mask na wasim han, ol pablik i no wok long bihainim ol dispela mesa. Na tu ol polis i no strongim ol dispela mesa na nau sik i go kamap pinis long ples na ol rurel komyuniti long olgeta hap bilong kantri we ol helt fesiliti na helt wokmanmeri i kisim bikpela bagarap pinis long COVID-19,” Sir Peter i tok.

“Ol bikpela haus sik bilong ol provins long kantri i nau stap long mak nogut. Planti bilong ol i stap long mak we ol i bai pas klostu taim na ol manmeri na pikinini bai kisim taim long kisim helpim bilong ol arapela sik.

“Bikpela namba bilong ol wokmanmeri na sikmanmeri i kisim sik COVID-19 na sampela wokmanmeri i les long kisim veksin long banisim ol yet long COVID-19 bikos ol infomesen na ol nius ol i harim long ol politisen, pablik seven na ol gavana i mekim ol i pret olsem veksin i no gutpela,” Sir Peter i tok.

Em i tok long luksave gut long hamas lain i kisim dispela sik, planti testing i mas kamap long olgeta hap.

“Maski namba bilong ol COVID-19 keis long NCD na Westen provins i bikpela tru, dispela i no givim gut infomesen long situesen long kantri i olsem wanem? Long NCD na Westen provins, planti test i wok long kamap na i soim namba bilong ol COVID-19 positiv keis. Ol narapela provins i no mekim planti test olsem na namba bilong ol COVID-19 keis i no planti.”

Em i tok moa olsem i gat nid bilong planti aisolosen senta.

“Mipela i mas i gat planti aisolesen senta. Salim ol manmeri i go bek long haus long ples em i no gutpela tumas bikos ol i ken salim sik i go i kam long narapela taim ol helt fesiliti i no gutpela tumas long ples,” Sir Peter i tok.

Em i tok narapela bikpela samting em maski em i laik bilong wan wan long tok yes na kisim veksin, em bai moa gutpela sapos olgeta manmeri na pikinini long kantri i kisim veksin na banisim ol yet long sik COVID-19.