PAPUA Niugini i kisim pinis 132, 000 COVID-19 AstraZenneca veksin long las wik long COVAX Fesiliti. Ol dispela veksin i makim namba wan sipmen bilong ol sipmen bilong veksin we bai kam long kantri long COVAX.

Gavman bilong PNG i tok tenkyu long COVAX Fesiliti long ol dispela 132,000 COVID-19 AZ veksin we i kam kamap long kantri long las wik. Dispela i soim olsem olgeta kantri long wol bai kisim gut sea long COVID-19 veksin.

World Health Organization, UNICEF na Gavi wanpela grup bilong ol veksin i bung wantaim na kamapim COVAX. COVAX i kamap long helpim ol liklik kantri long kisim gut ol veksin bilong COVID-19.

“Wantaim ol dispela namba wan sipmen bilong veksin, mipela i bai sapotim gavman long banisim ol namba wan helt na franlain woka long olgeta provins na tu banisim ol lain husat i kisim bikpela sik long COVID-19,” Kodineta bilong UN long kantri, Gianluca Rampolla i mekim dispela toktok las wik.

“Mipela i bin stat long banisim ol dispela lain long kantri taim Australia i bin givim 8,000 veksin long kantri long mun Mas. Mipela i laik olsem long pinis bilong dispela yia, 20 pesen bilong ol pipel bilong PNG i banisim ol yet long COVID-19 wantaim ol dispela veksin.”

Em i tok WHO na UNICEF bai go het long sapotim gavman bilong PNG long kisim ol arapela sipmen bilong COVAX. COVAX i givim moa long 38 milien veksin i go long moa long 100 kantri pinis long sevim laip bilong ol manmeri na pikinini long ol dispela kantri.

European Union na ol gavman bilong Australia, Japan, Republic ov Korea, France, New Zealand, Philipines, United kingdom na USA i wokbung wantaim long kamapim dispela COVAX fesiliti.

Mista Rampolla i tok, COVID-19 em i salens bilong wol na em i nidim wokbung bilong olgeta long daunim dispela salens.

“Yumi bai stap seif sapos olgeta lain i seif.”

“COVID-19 em i stap longwe tru long pinis. Na i luk olsem i gat planti wok long mekim. Tasol sapos yumi olgeta i pas na wokbung wantaim, bai yumi i abrusim dispela salens,” Mista Rampola i tok.

Rebecca Negere i raitim