RUMGINAE Komyuniti Helt Woka Trening skul long Not Fly Distrik long Westen Provins bai i lukim sampela senis.

Planti yia nau ol i bin singaut long helpim long nupela klasrum, long pawa saplai, tisa na ol arapela samting long helpim skul tasol helpim i no kam hariap. Ol sumatin long dispela skul i save helpim long Rumginae Rurel Haus Sik.

Tasol Westen Provins Gavana Taboi Awi Yoto nau i apim wok bilong helt long provins bilong en, na Rumginae Komyuniti Helt Woka Trening Skul em i wanpela praioriti bilong em.

Mista Awi Yoto i tok insait long dispela projek ol bai i bildim foapela nupela haus tisa, wanpela edministresen bilding, wanpela e-laibri, tupela domitori na wokim ekstensen long ol klasrum.

Ol Ivenjelikel Sios bilong Papua Niugini (ECPNG) i bin sanapim dispela skul long 1967 na ol i trenim moa long 700 komyuniti helt woka pinis.

Wantaim ol senis i kamap long dispela skul, Prinsipal bilong skul Amos Kupaloma i tok nupela nem bilong skul em Rumginae Nesing Skul na stat long neks yia ol bai i givim trening long mak bilong diploma long jeneral nesing.

Mista Kupaloma i singaut long provinsal gavman na ol arapela stekolda long go het yet long helpim na sapotim dispela projek bilong bringim gutpela helt kea sevis long ol pipel bilong Westen Provins.

Long dispela taim tu Mista Kupaloma i toksave olsem liklik taim bai ol fom bilong enrolmen long skul neks yia bai i redi na ol husat i laik go long dispela skul i ken aplai.