UNIVERSITY Of Goroka (UOG) i mekim opisal opening bilong Sauten Rijonal Kempas bilong en long Nesenel Kapitel Distrik.

 Dispela opisal seremoni bilong burukim graun i kamap bihainim miting bilong ol kaunsil memba bilong yunivesiti long las wik fraide.

Yunivesiti i bai karim kempas bilong ol i kam long Nesenel Kapitel distrik long sevim NCD na sauten rijon wantaim.

Sensela bilong Yunivesiti Mista Joseph Sukwianomb i tok, yunivesiti bai lukluk long skul bilong ol tisa, skul bilong ol liklik yangpela, na planti skul na program ol i save ranim tu i kam daun hia long sauten rijonal kempas.

Mista Sukwianomb i tok, “Graun bilong bildim skul em yunivesiti i bin baim long wanpela pablik seil long mani mak olsem K2milien. Dispela projek bai pinis insait long 12-15 mun long lukluk bilong ol bilda na kontrakta.”

Em i tok, “Astingting bilong opim dispela senta i bilong soim strongpela tingting olsem yunivesiti bai i bringim ol skul bilong en i go tu long ol longwe hap bilong kantri olsem ol distrik na provins tu.”

 “Yunivesiti i gat ol provinsal stadi senta long Simbu, Westen Hailans, Wes Nu Briten, Oro, NCD, Sauten Hailans, Enga na Is Sepik,” Mista Sukwianomb i  tok.

Yunivesiti i gat pinis kempas hia long NCD tasol dispela senta bai kamap long inapim tru ol arapela wok bilong em long Pot Mosbi na Sauten rijon.

Vais Sensela bilong Yunivesiti Professor Musawe Sinebare i tok em i  amamas tu long olgeta kaunsil long kamap long witnesim dispela opisel seremoni bilong brukim graun..

“Long namba wan taim tru mipela bai kam stap long kapitel bilong kantri. Olsem tasol yunivesiti bai stap aninit long tok orait bilong steit na bilong stap inap longpela taim,” Profesa Sinembare i tok.

Wok i stat pinis long senta.

Kingsley Tabing i raitim